Zyrtari i Lidhjes Demokratike të Kosovës, Besian Mustafa, ka mohuar se ekzistojnë përplasje apo pakënaqësi mes LDK-së dhe kryetarit të Prishtinës, Përparim Rama, pas zhvillimeve të fundit rreth koalicioneve në kryeqytet.
Në “Përballje Podcast”, Mustafa tha se LDK-ja dhe Rama kanë fituar së bashku Prishtinën dhe vazhdojnë ta qeverisin bashkë, ndërsa vendimet për koalicionet komunale i takojnë vetë kryetarit të komunës.
“LDK-ja së bashku me Përparim Ramën e kemi fitu Prishtinën edhe para katër vjetëve edhe tash në vitin e kalum… është një ekip i përbashkët”, deklaroi Mustafa.
Debati për raportet mes Ramës dhe LDK-së u rikthye pasi PDK-ja njoftoi publikisht për një koalicion në Prishtinë, ndërsa më pas pati reagime nga zyrtarë të LDK-së se partia nuk kishte marrëveshje zyrtare me PDK-në.
Read more:Mustafa: Vetëvendosje e çoi Kosovën në zgjedhje duke refuzuar kompromisin për presidentin
Mustafa tha se nuk bëhej fjalë për distancim nga Rama, por vetëm për sqarim të mënyrës së funksionimit të koalicioneve lokale.
“Nuk ishte distancim, ishte shpjegim… në nivel komunal koalicionet i bën kryetari i komunës”, u shpreh ai.
Sipas tij, Përparim Rama ka ndërtuar një formacion politik për ta udhëhequr komunën gjatë mandatit katërvjeçar, por kjo nuk nënkupton koalicion formal të LDK-së me partitë tjera në nivel partie.
Read more:Pak orë afat, PSD konfirmon pjesëmarrjen në zgjedhje – 5 parti heqin dorë nga gara
“Si parti politike nuk kemi një koalicion me partitë tjera në Prishtinë… por natyrisht zoti Rama si kryetar i komunës ka bërë një formacion politik për të udhëheqë komunën për katër vjet”, deklaroi Mustafa.
I pyetur nëse ekziston ndonjë përplasje mes kryetarit të LDK-së, Lumir Abdixhiku dhe Përparim Ramës, Mustafa e mohoi kategorikisht një gjë të tillë.
“Jo, jo, s’ka as të mëdha, as të vogla… s’ka përplasje e pakënaqësi”, tha ai. /Telegrafi/
