Paraqitjet e mira të Wesley Franca me Romën kanë tërhequr vëmendjen e disa prej klubeve më të mëdha në Evropë.
Braziliani 22-vjeçar, i transferuar verën e kaluar për rreth 25 milionë euro, është përshtatur shpejt me ritmin e Serie A dhe është kthyer në një lojtar të rëndësishëm në skemat e trajnerit Gian Piero Gasperini.
Falë fleksibilitetit të tij në fushë, Wesley është përdorur në disa role, si mbrojtës krahu dhe mesfushor anësor në të dy krahët, duke bindur me kontributin e tij si në fazën defensive ashtu edhe në atë sulmuese.
Read more:Lituania propozon vendosjen e trupave për të mbështetur SHBA-në në Ngushticën e Hormuzit
Sipas raportimeve të mediave ndërkombëtare, interes për lojtarin kanë shfaqur Manchester City, Barcelona dhe Real Madrid, të cilët po monitorojnë nga afër zhvillimin e tij.
Megjithatë, Roma nuk ka ndërmend të heqë dorë lehtë nga braziliani. Klubi italian e konsideron Wesley një pjesë të rëndësishme të projektit afatgjatë, sidomos pasi ai ka kontratë të vlefshme deri në vitin 2030.
Raportet sugjerojnë se vetëm një ofertë që kalon shifrën e 55 milionë eurove mund ta detyrojë klubin roman të shqyrtojë mundësinë e shitjes së tij gjatë merkatos së ardhshme.
Me interesin në rritje nga elita evropiane, Wesley pritet të jetë një nga emrat më të përfolur në muajt e ardhshëm të merkatos. /Telegrafi/
