Durim Bami është transferuar sërish nga sistemi penitenciar, këtë herë nga burgu i Fushë-Krujës drejt burgut të sigurisë së lartë në Peqin.
Burime të gazetares Keti Banushi bëjnë me dije se transferimi është kryer gjatë ditës së sotme për arsye sigurie. Lëvizja vjen më pak se një muaj pasi Drejtoria e Përgjithshme e Burgjeve pranoi kërkesën e Bamit për t’u transferuar nga burgu 313 në Tiranë drejt burgut të Fushë-Krujës.
Kërkesa ishte miratuar më 18 prill nga drejtori i ri i burgjeve, Adriatik Kupi, pas refuzimit të mëparshëm nga ish-drejtori Klevis Qose.
Read more:Artan Fuga: Puthja e Robertit!
Bami e kishte kërkuar zhvendosjen pas ekstradimit nga Dubai në fund të shkurtit, duke pretenduar se në burgun 313, por edhe në burgjet e Peqinit dhe Reçit, ndodheshin persona që paraqisnin rrezik për jetën e tij.
Sipas kërkesës së depozituar nga avokati i tij Ilir Murati, burgu i Fushë-Krujës konsiderohej alternativa më e përshtatshme. Në kërkesë përmendej edhe gjendja jo e mirë shëndetësore dhe stresi i vazhdueshëm që, sipas mbrojtjes, Bami përjetonte nga prania e personave të arrestuar për vrasje dhe përfshirje në grupe kriminale.
Ndërkohë, ditët e fundit burgjet në vend janë përfshirë në kontrolle të shumta në qeli, përfshirë edhe burgjet e sigurisë së zakonshme.
Sipas burimeve të Report TV, kontrollet po kryhen në kuadër të një plani masash të Drejtoria e Përgjithshme e Burgjeve për të goditur fenomenin e përdorimit të telefonave celularë dhe sendeve e ndaluara në qeli, si edhe për të bllokuar takimet speciale të disa të burgosurve VIP.
Bami është nën masën e sigurisë “Arrest në burg” me urdhër të Gjykata e Posaçme Kundër Korrupsionit dhe Krimit të Organizuar për disa vepra penale, mes tyre “Sigurimi i kushteve dhe mjeteve materiale për të kryer vrasje”, “Grupi i strukturuar kriminal” dhe “Kultivimi i bimëve narkotike”.
Read more:Numër rekord i të burgosurve në Zvicër
Sipas SPAK, ai akuzohet se kishte kërkuar eliminimin e ish-deputetit socialist Arben Ndoka, ndërsa emri i tij është përmendur edhe në planet për vrasjen e Tori Xheçuka dhe Erigers Mihasi.
Po ashtu, sipas SPAK, Bami drejtonte një grup që kultivonte kanabis në zonën e Niklës dhe Bubqit, me ndihmën e ish-efektivit të RENEA-s Altin Morina dhe personave të tjerë.
