Më 3 maj të vitit 2016, Federata e Futbollit të Kosovës u pranua me drejta të plota në UEFA,derisa 10 ditë më vonë edhe shtëpia më e madhe e futbollit në botë, FIFA e pranoi zyrtarisht Kosovën.
Në kongresin e 66-të të FIFA-s në Meksikë, presidenti i atëhershëm i FFK-së, Fadil Vokrri ishte i pranishëm në Mexico City së bashku me Flamur Bunjakun që në atë kohë ishte pjesë e Komitetit Ekzekutiv në FFK.
Kosova u pranua në FIFA me 141 vota pro dhe 23 të tjera ishin kundër.
Tani janë bërë 10 vite apo një dekadë nga pranimi i Kosovës në FIFA, ku Dardanët janë zhvilluar shumë në të gjitha aspektet.
Read more:FIFA trefishon çmimin e biletave më të mira për finalen e Kupës së Botës
Shkrimi i plotë nga FFK dhe Agim Ademi:
Sot shënojmë me krenari 10-vjetorin e anëtarësimit të Kosovës në FIFA, një moment historik ku FFK u bë anëtarja e 210-të e shtëpisë më të madhe të futbollit botëror.
Ky ishte një triumf i madh për futbollin dhe shtetin tonë, pas një rruge të gjatë sakrificash, përkushtimi dhe besimi të palëkundur. Ishte fitore e të gjitha gjeneratave që mbajtën gjallë futbollin e Kosovës edhe në periudhat më të vështira.
Në këtë përvjetor jubilar, me respektin dhe mirënjohjen më të thellë kujtojmë legjendën Fadil Vokrri dhe të gjithë ata që dhanë kontribut të jashtëzakonshëm në këtë rrugëtim historik.
Read more:FFK shpreh ngushëllime për ndarjen nga jeta të Rifat Stojkajt
Mirënjohje e veçantë edhe për presidentin e FIFA-s, Gianni Infantino, për mbështetjen dhe miqësinë e vazhdueshme ndaj Kosovës dhe futbollit tonë.
Pranimi në FIFA ishte fillimi i një epoke të re. Sot, FFK është një institucion modern, me infrastrukturë në zhvillim të vazhdueshëm dhe me ekipet kombëtare e klubet tona që përfaqësojnë me dinjitet Kosovën në arenën ndërkombëtare.Vazhdojmë përpara me krenari dhe përgjegjësi, me futbollin për Kosovën. Urime Kosovë. /Telegrafi/
