Pas ngujimit për disa orë të minatorëve pas një defekti që pësoi trafoja kryesore në minierë, reagon Sindikata e Pavarur e Minatorëve të Trepçës.
Sipas reagimit thuhet se sindikata vazhdimisht po alarmon për gjendjen e rënduar dhe mungesën e investimeve, të cilat po rrezikojnë drejtpërdrejt jetën dhe shëndetin e minatorëve.
“Sot tashmë po vërtetohet ajo që kemi theksuar prej kohësh. Gjendja në minierë është shqetësuese dhe kërkon veprim urgjent. Trepça ka nevojë të menjëhershme për investime serioze në pajisje dhe kushte pune. Me pajisje të vjetra dhe mungesë mirëmbajtjeje nuk mund të ketë zhvillim, por vetëm rritje të rrezikut. Është e domosdoshme që institucionet përgjegjëse të marrin masa konkrete për të parandaluar më të keqen”, thuhet në reagim.
Read more:“Trepça nuk zhvillohet pa investime dhe me borxhe milionëshe”, Sindikata kërkon kushte për minatorët
Nga Sindikata po ashtu tha se: “Shpresojmë që të mos kemi pasoja në jetë njerëzish, sepse çdo vonesë në reagim mund të kushtojë shtrenjtë. Siguria e minatorëve duhet të jetë prioritet absolut”. /Telegrafi/
