Konferenca Ndërqeveritare në Bruksel mbylli një etapë me rëndësi për Shqipërinë, duke e kaluar në klasën tjetër më afër BE.
Për ekspertët e integrimit tashmë vendi ndodhet në mes të rrugëtimit dhe detyra më sfiduese e presin.
“Një arritje e rëndësishme miratimi i raportit IBAR-it, është vlerësim pozitiv për punën e bërë në reformat vecanërisht në drejtësi, luftën kundër korrupsionit, administrata publike, prokurimet, etj krimit të organizuar, etj dhe jepen standardet finale që Shqipëria duhet të plotësojë për anëtarësimin dhe hyjmë në fazën më të rëndësishme të tij. Mund të themi në gjysmën e dytë por është më e vështira”, u shpreh eksperti Gledis Gjipali.
Read more:Kurti: Radoiçiq duhet t’i dorëzohet Kosovës, pa përmbushjen e tri masave nuk ka përparim në dialog
Drejtuesi i Lëvizjes Europiane në Shqipëri Gledis Gjipali analizon se afati i vendosur nga qeveria për të finalizuar negociatat teknike në 2027 është i ngushtë për të arritur jo thjesht përafrimin e legjislacionit por garantimin e standardeve europiane në jetën e shqiptarëve, proces që pritet të prek financiarisht sipërmarrjet vendase.
“Që në fillim ishte një objektiv ambicioz, mendoj se është bërë akoma më shumë ambicioz për faktin se nevojitet një shpejtësi më e madhe në reforma. Ngelet një vit e gjysmë për afatin, janë diku te 400 akte ligjore dhe nënligjore që duhen ndërmerren gjatë kësaj periudhe. Por fokusi më i madh është te zbatimi i tyre dhe ne duhet të tregojmë që arrijmë të vendosim standard europiane në sigurinë ushqimore, në mjedis, mbrojtje konsumatori, tregti. Ka kosto si proces”, thotë eksperti Gjipali.
Situata brenda vetë unionit dhe rreth tij i rrit mundësitë Shqipërisë të përshpejtohet ritmi i pranimit në BE, thekson Gjipali, por në të njëjtën kohë e panegociueshme mbetet edhe përmbushja e kritereve për arsim më cilësor, shëndetësi më të mirë, drejtësi të pavarur, institucione më të forta, më të zhvilluara me në fokus respektimin e të drejtave të njeriut.
“Jemi në një moment të favorshëm gjeo-politikë pas luftës në Ukrainë në 2022. Bashkimi Europian ka një qasje shumë më të përshpejtuar për procesin e zgjerimit. Kjo e favorizon Shqipërinë, por mos harrojmë pjesën e meritës, që secili vend duhet të plotësojë detyrat e shtëpisë është një element i padiskutueshëm për BE”, përfundoi Gjipali.
Me prioritet këshillohet përfshirja e shoqërisë civile dhe bizneseve në procesin e integrimit, për të realizuar përputhshmërinë e standardeve.
