Një aksident i rëndë rrugor i regjistruar këtë të hënë në Kurbin i ka marrë jetën një 37-vjeçari, ndërsa policia ka vënë në pranga drejtuesen e automjetit të përfshirë në ngjarje.
Sipas njoftimit zyrtar, rreth orës 13:00, në aksin rrugor Laç–Patok, një automjet i drejtuar nga A. S., 33 vjeçe, banuese në fshatin Grëz të Fushë-Kuqes, është përplasur me një ciklomotor që drejtohej nga shtetasi L. T., 37 vjeç, banues në Fushë-Kuqe.
Read more:Aksident në Peqin/ Dy makina përplasen me njëra-tjetrën, plagoset një nga drejtuesit dhe një i mitur
Për pasojë, 37-vjeçari ka pësuar dëmtime të rënda dhe është transportuar me urgjencë drejt Spitalit të Traumës në Tiranë. Megjithatë, pavarësisht përpjekjeve të mjekëve, ai nuk ka mundur t’u mbijetojë plagëve dhe ka ndërruar jetë rreth orës 18:40.
Pas ngjarjes, specialistët e Qarkullimit Rrugor arrestuan në flagrancë 33-vjeçaren për veprën penale “Shkelja e rregullave të qarkullimit rrugor”, me pasojë vdekjen e një personi.
Ndërkohë, materialet procedurale i janë referuar Prokurorisë, e cila do të vijojë hetimet për zbardhjen e plotë të rrethanave të aksidentit.
