Inspektorati i Lartë i Drejtësisë, siç mëson Report TV, ka kërkuar shkarkimin e anëtarit të KLP-së Olger Eminaj, të përfshirë në një skandal seksual. Çështja tani i ka kaluar Gjykatës Kushtetuese. Ndaj Eminajt, nisi një hetim nën dyshimet për shkelje disiplinore, menjëherë pas publikimit të komunikimeve me natyrë erotike me një qytetare, gjatë orarit të punës.
***
Ndërsa kërkonte Drejtësi në dyert e institucioneve, një qytetare me inicialet R.M. ra në kontakt në rrjetet sociale me Olger Eminajn, anëtar i Këshillit të Lartë të Prokurorisë. Komunikimi, i cili kaloi më pas në WhatsApp, mori më tej natyrë thellësisht erotike.
Sipas materialeve të siguruara nga “Shoqata Media dhe Drejtësi” e të denoncuara në emisionin “STOP”, anëtari i KLP-së Eminaj i ka dërguar foto të organit gjenital dhe ka zhvilluar biseda me përmbajtje seksuale, madje edhe gjatë orarit zyrtar dhe brenda ambienteve të institucionit, ku ushtron detyrën.
Rasti u denoncua më 23 mars të këtij viti, dhe të nesërmen Inspektori i Lartë i Drejtësisë ka nisur me iniciativë, një hetim disiplinor ndaj Eminajt, lidhur me dyshimet për kryerjen e shkeljeve disiplinore.
Në një përgjigje për Report TV, ILD shpjegon se “Pas përfundimit të veprimeve hetimore, raporti hetimor i Inspektorit të Lartë të Drejtësisë i është përcjellë më datë 1 Qershor, Kolegjit të Posaçëm të Apelimit, organi kompetent, me fuqinë e Gjykatës Kushtetuese, për shqyrtimin dhe vendimmarrjen lidhur me kërkesën disiplinore të paraqitur”.
Kolegji ka pushuar së funksionuar që prej 18 qershorit. Rasti i është përcjellë Gjykatës Kushtetuese e cila do të kryejë funksionet e saj, dhe ka caktuar tanimë dhe relatoren e çështjes, anëtaren Marjana Semini.
Në përgjigjen zyrtare, ILD nuk dha shpjegime se çfarë mase ka kërkuar. Por Report TV ka mësuar, përmes burimeve të tjera, se bëhet fjalë për shkarkimin e anëtarit të KLP-së, sjellja e të cilit mesa duket është konsideruar një shkelje e rëndë.
