Një zjarr ka rënë në malin e Shëngjinit, pranë rrugës kryesore në lagjen Sake, duke përfshirë një sipërfaqe të konsiderueshme me shkurre dhe bimësi.
Flakët janë përhapur me shpejtësi për shkak të bimësisë së dendur dhe të tharë në këtë zonë, duke favorizuar avancimin e zjarrit.
Terreni e bën të vështirë ndërhyrjen pranë vatrës, ndërsa pati edhe një shpërthim brenda saj. Dyshohet se për shkak të shpërthimit, një copë guri plagosi pasagjerin e një makine që po shkonte drejt Shëngjinit. I riu u transportua menjëherë drejt Spitalit të Lezhës për ndihmë mjekësore.
Specialisti i Drejtorisë së Përgjithshme të Shërbimit Zjarrfikës, Agustin Pepkolaj, ka folur në lidhje me zjarrin që ka përfshirë malin e Shëngjinit, duke bërë të ditur se situata paraqitet e vështirë për shkak të terrenit të thyer ku po zhvillohet operacioni.
Sipas Pepkolajt, aktualisht flakët nuk paraqesin rrezik për zonat e banuara, ndërsa ekipet zjarrfikëse vijojnë punën intensive për izolimin dhe shuarjen e vatrës së zjarrit.
Read more:Zjarr pranë Ranës së Hedhun në Shëngjin, zona me pisha përfshihet nga flakët
Në terren janë angazhuar gjashtë mjete zjarrfikëse nga bashkitë e Lezhës dhe Vau i Dejës, si dhe strukturat e tjera të Mbrojtjes Civile, të cilat po punojnë në koordinim për të mbajtur situatën nën kontroll.
Autoritetet mbeten në gatishmëri, ndërsa operacioni do të vijojë deri në neutralizimin e plotë të zjarrit.
