TIRANË– Gjykata e Tiranës ka dhënë vendimin për masat e sigurisë ndaj 21 protestuesve të arrestuar pas protestës së zhvilluar para Kuvendit.
Gjykata ka caktuar masën e sigurisë “arrest në burg” për dy protestues, Ervin Gogën dhe Everest Bardhin, ky i fundit anëtar i Grupit Koordinues dhe një nga firmëtarët e letrës së dërguar ambasadave më 26 qershor.
Për 12 protestues të tjerë, gjykata ka vendosur masën “detyrim paraqitje”, ndërsa për 2 persona është caktuar masa “arrest në shtëpi”. Ndërkohë, për pesë protestuesit e mbetur, gjykata ka vendosur të mos caktojë asnjë masë sigurie.
Në paraburgim u la Ervin Goga dhe Everest Bardhi, i cili është pjesë e Grupit Koordinues dhe një nga firmëtarët e letrës dërguar ambasadave më 26 qershor.
Jashtë ambienteve të gjykatës janë mbledhur protestues dhe përfaqësues të Grupit Koordinues, të cilët, ashtu siç kishin paralajmëruar një ditë më parë, protestuan duke kërkuar lirimin e të arrestuarve.
Revoltën për arrestimin e 21 qytetetarëve, protestuesit e shprehën me dhunë në protestën e djeshme kombëtare që u zhvillua në kryeqytet. Pas gati 2 orësh fjalime, qytetarët marshuan si zakonisht rrugëve të kryeqytetit, por situata u tensionua te komisariati numër 3 në rrugën “Mine Peza”, aty ku mbahen protestuesit e arrestuar.
Rreth orës 23:45 ishte një grup qytetarësh, disa prej të cilëve të maskuar, që me gurë e shkopinj sulmuan komisariatin duke thyer xhamat. Madje ata arritën të shqyejnë edhe derën dhe disa depërtuan brenda dhomës së pritjes.
Protestuesit e arrestuar janë në akuzë për 7 vepra penale, shkatërrim prone, kundërshtim i punonjësit të policisë, goditje për shkak të detyrës, prishje e rendit dhe qetësisë publike, organizim dhe pjesëmarrje në grumbullime dhe manifestime të paligjshme, mosbindje ndaj urdhrit të ligjshëm të policisë dhe pengim i qarkullimit të mjeteve. Më 2 korrik, para ambienteve të Kuvendit, deputëtë dhe policë u qëlluan me vezë dhe gurë disa herë.
Lajm në përditësim…
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë.
Përfundon shqyrtimi i arrestit në flagrancë për 21 protestuesit, pritet vendimi i gjykatës dhe për masat! Për Altin Hilën prokuroria kërkon arrest shtëpie
Avokati i një prej 21 protestuesve të arrestuar, që kanë dalë para Gjykatës së Tiranës për vlerësimin e masës së sigurisë, thotë se shqyrtimi ka përfunduar dhe gjykata është tërhequr për të marrë vendimin, që ende nuk dihet se kur mund ta shpallë.
“Sapo u përmbyll me sukses çështja që është në shqyrtim për masën e sigurimit personal për të arrestuarit në protestë. Është konstatuar nga ana e avokatëve paligjshmëria e arrestimit në flagrancë dhe mosvendosja e sigurimit për këta persona. Gjykata në këto momente është tërhequr në dhomën e këshillimit për të caktuar masat e sigurisë dhe për arrestin në flagrancë”, tha avokati.
Avokati tha se Prokuroria ka ulur sërish numrin e të arrestuarve për të cilët kërkon arrest në burg, me arsyetimin se njëri prej tre protestuesve, për të cilët u kërkua ajo masë sigurimi personal, ka fëmijë të sëmurë në shtëpi dhe duhet të kujdeset për ta. Me shumë gjasë, protestuesi në fjalë mund të jetë Altin Hila, i cili në ditën që u arrestua u dëgjua duke thënë: “Ka ikur nusja në punë, 2 kalamajtë e vegjël janë vetëm te shtëpia, ju lutem, spitali i Durrësit, shkoni te fëmija, unë nuk kam problem, rri sa të duash në burg, po fëmija mos të vdesë.”
“Vetëm për 2 persona është kërkuar masa shtrënguese ‘arrest në burg’, për njërin ‘arrest në shtëpi'”, është kërkesa e prokurorëve, sipas avokatit.
Seanca për vlerësimin e masës/ Autoambulanca me mjekë mbërrin në Gjykatën e Tiranës, protestuesi i arrestuar nuk u ndje mirë (VIDEO)
Ndërkohë që prej orës 09:30 në Gjykatën e Tiranës vijon seanca për vlerësimin e masës së sigurisë për 21 të arrestuarit nga protesta e dhunshme para Kuvendit, një autoambulancë dhe disa mjekë kanë mbërritur në ambientet e gjykatës, pasi një prej të arrestuarve, me inicialet N.Q. nuk është ndjerë mirë.
Protesuesi në fjalë thuhet se vuan nga epilepsia, pretendim i deklaruar dje nga avokati Gentian Serjani. Ky i fundit, së bashku me aktivisten Sidorela Vatnikaj, thanë dje se që nga momenti i prangosjes së tij, ai ka pësuar 3 kriza epileptike. Gjithashtu, gjatë këtyre momenteve, sipas avokatit dhe aktivistes, protestuesi është dhunuar nga bliutë.
Read more:Durim Bami largohet nga Fushë-Kruja, transferohet në burgun e sigurisë së lartë në Peqin
Report Tv mësoi përmes burimeve nga policia, se N.Q. ka shfaqur probleme shëndetësore, dhe për to është transportuar disa herë në spital, ku ka marrë shërbim sipas vlerësimit të bluzave të bardha. Nga momenti i shoqërimit, thanë të njëjtat burime, ai ka refuzuar të konsumojë ushqim, dhe është dashur dërgimi në spital për të marrë serum. Por në një moment, i paraburgosuri, ka refuzuar të bëjë serumin, ka ofenduar, dhe ka hequr me forcë vigonin nga venat, çka i ka shkaktuar gjakderdhje.
Kjo thanë burimet, shpjegon edhe bluzën e gjakosur që avokati tha se është prej dhunës nga efektivët.
