Deputeti i Partisë Demokratike, Belind Këlliçi, ka akuzuar Ministrinë e Mbrojtjes për mungesë transparence lidhur me aktivitetin e kompanisë “Advanced Arms Technology” (AAT), ku është aksionere me 20% kompania KAYO, duke kërkuar përgjigje mbi prodhimin dhe eksportin e armatimit.
Këlliçi kujtoi se gjatë interpelancës parlamentare të 23 prillit, ministri i Mbrojtjes, Ermal Nufi, deklaroi se AAT prodhon armë dhe se ato përdoren aktualisht në zona konfliktesh.
Read more:Balluku fshehu vilën në emër të tij, Igli Tare ankimon sekuestron në Apelin e GJKKO
Sipas deputetit demokrat, më 28 prill 2026 ai i ka dërguar Ministrisë së Mbrojtjes një kërkesë për informacion, por edhe pse kanë kaluar më shumë se 60 ditë, nuk ka marrë ende përgjigje, pavarësisht afatit ligjor prej 15 ditësh.
Këlliçi kërkon që ministri të sqarojë nëse e konfirmon deklaratën e bërë në Kuvend, sa armatim dhe municione janë prodhuar nga AAT, në cilën fabrikë janë prodhuar armët, si dhe kur është realizuar eksporti i parë dhe cili ka qenë destinacioni i tij.
Në reagimin e tij, deputeti i PD-së akuzon ministrin për mungesë transparence dhe i bën thirrje të japë përgjigje publike mbi këto çështje.
Këlliçi i kujton Nufit se në rastet kur ka shkelje ata që sakrifikohen janë ushtarët dhe për këtë i kujton rastin e ish-zv.kryeministres Belinda Balluku.
“Në interpelancën parlamentare të datës 23 prill, Ministri i Mbrojtjes, Ermal Nufi, deklaroi:
“Së fundmi kemi dhe shoqërinë AAT, Advanced Arms Technology, e cila prodhon armë dhe këto armë, siç e thashë edhe njëherë, janë sot në përdorim në konflikte diku, jo patenta fiktive.”
Pra ministri Nufi informoi Kuvendin se kompania e mikut të Edi Ramës, Ron Yeffet, “Advanced Arms Technology”, ku ortak me 20% është dhe KAYO, jo vetëm që ka prodhuar armatim, por se ky armatim është eksportuar dhe përdoret aktualisht në zona konflikti!
Për këtë arsye, menjëherë pas deklaratës, më 28 prill 2026 i drejtova Ministrisë së Mbrojtjes një kërkesë për informacion.
Ligji për të drejtën e informimit është i qartë: institucioni publik ka detyrimin të përgjigjet brenda afatit ligjor prej 15 ditësh. Kanë kaluar më shumë se 60 ditë dhe deri më sot, nuk kam marrë ende asnjë përgjigje.
Prandaj sot po bëj publike disa nga pyetjet që pres ende të marrin përgjigje nga Ministri i Mbrojtjes Ermal Nufi:
1. Në interpelancën parlamentare deklaruat se: “Advanced Arms Technology e cila prodhon armë dhe këto armë, siç e thashë edhe njëherë janë në përdorim sot në konflikte diku, jo patenta fiktive”. Pra ju keni informuar Deputetët e Kuvendit të Shqipërisë se shoqëria AAT ka prodhuar armatim dhe municione dhe madje ka lidhur edhe kontrata me vënde të tjera, duke i eksportuar aty ku ka konflikte SOT? A e konfirmoni edhe sot këtë deklaratë dhënë në seancë parlamentare?
2. Çfarë sasie armatimi dhe municionesh është prodhuar nga kjo shoqëri?
3. Në cilën fabrikë janë prodhuar këto armë dhe ku gjendet?
4. Kur është realizuar eksporti i parë dhe cili ka qenë destinacioni i tij?
Ermal, heshtja nuk të shpëton nga përgjegjësia ligjore!
Kur zgjedh t’i shërbesh pushtetit të Edi Ramës në dëm të interesit publik, kujtoje rregullin e vjetër të politikës se ai që pranon të bëhet ushtari i mbretit për të mbuluar zullumet e tij, nuk arrin dot deri në fund të lojës.
Në shah, mbreti mbrohet gjer në fund, ushtarët sakrifikohen pa mëshirë. Për më shumë, pyet shefe Belën”, deklaron Këlliçi.
