Kryetari i Partisë MUNDËSIA, Agron Shehaj, ka denoncuar përdorimin e shkollave për të ftuar nxënësit në koncertin e Kanye West, që do të mbahet më 11 korrik.
Shehaj publikoi një mesazh që, sipas tij, u është dërguar prindërve nga shkolla, ku njoftohen se fëmijët e tyre janë përzgjedhur për të marrë pjesë në koncert.
“Imagjinoni të jeni një prind dhe t’ju vijë ky mesazh nga shkolla.
‘Përshëndetje! Vajza juaj është përzgjedhur nga shkolla për rezultatet e shkëlqyera për të marrë pjesë në datën 11 korrik në koncertin e Kanye West.’”
Shehaj tha se Kanye West është një këngëtar që ka shprehur publikisht qëndrime pro nazizmit dhe Hitlerit.
“Kanye West është ky, një adhurues i nazizmit dhe një adhurues i Hitlerit.”
Sipas Shehajt, është e papranueshme që shkollat në Shqipëri të ftojnë nxënësit e dalluar për të ndjekur koncertin e një artisti të tillë.
“Vetëm në Shqipëri mund të ndodhë që shkolla fton nxënësit e dalluar të shkojnë dhe të ndjekin koncertin e një këngëtari, koncertin e të cilit në shumë vende të botës e kanë ndaluar sepse është një mbështetës i nazizmit.”
Read more:Katër versione si mund të ndahemi me Ramën – Ide
Ai u shpreh se ndryshe nga vende të tjera, ku sipas tij koncertet e Kanye West janë ndaluar, në Shqipëri kryeministri Edi Rama ka shpenzuar miliona euro për të blerë biletat e koncertit.
“Në Itali, në Angli, në Korenë e Jugut, qeveritë kanë ndaluar koncertet e tij. Ndërsa në Shqipëri ndodh e kundërta. Edi Rama ka harxhuar mbi 4 milionë € për të blerë biletat e koncertit të këtij këngëtari dhe tani duhet të mbushë stadiumin.”
Sipas Shehajt, për të mbushur koncertin po ftohen nxënësit e dalluar, militantët dhe patronazhistët, ndërsa kryeministri kërkon të tregojë se aktiviteti do të zhvillohet pavarësisht protestës qytetare që prej 40 ditësh kërkon dorëheqjen e tij.
“Atëherë fton nxënësit e dalluar, fton militantët, fton patronazhistët sepse ka nevojë të mbysë protestën. Do të tregojë që koncerti do të jetë madhështor dhe do të bëhet pavarësisht se ka 40 ditë që protestuesit mbushin bulevardin duke kërkuar dorëheqjen e Edi Ramës, duke kërkuar që Edi Rama të dalë para drejtësisë.”
Në fund, Shehaj e cilësoi të papranueshme përdorimin e parave publike për këtë koncert.
“Kjo është e papranueshme! Nuk mund të harxhohen paratë e qytetarëve shqiptarë për të mbështetur dhe për të blerë biletat e një këngëtari që adhuron nazizmin. Kjo mund të ndodhë vetëm në Shqipëri.”
