Apeli i Posaçëm ka kaluar në favor të shtetit 22 pasuri të Gramoz Totos, një person i dënuar me 18 vite burg nga drejtësia italiane për kryerjen e veprës penale “Shfrytëzim prostitucioni”, në kuadër të grupit të strukturuar kriminal.
Shkalla e dytë e gjyqësorit la në fuqi vendimin e dhënë më herët nga GJKKO, duke konfiskuar përfundimisht 16 pasuri të paluajtshme të Gramoz Totos, si dhe 6 automjete, në emër të tij dhe familjarëve të tij.
Pasuritë përfshijnë troje dhe ndërtesa në Dushnik të Beratit, tokë arë me sipërfaqe 6,500 m², godina dhe objekte shërbimi, një kompleks sportiv, apartamente dhe ndërtesa në rrugën “Çlirimi”, Berat, ullishte me sipërfaqe rreth 112 m² dhe objekte të tjera ndërtimi. Po ashtu, u konfiskuan 6 automjete që figurojnë në emër të Gramoz Totos dhe familjarëve e të afërmve të tij.
Pasuritë tashmë do të administrohen nga Agjencia e Administrimit të Pasurive të Sekuestruara dhe të Konfiskuara. Gramoz Toto u hetua nga prokurori i SPAK, Behar Dibra, në kuadër të ligjit Antimafia. Atij dhe familjarëve të tij iu hetua pasuria, e cila u përfitua në mënyrë të paligjshme dhe ishte e pajustifikuar.
Read more:Gjyqi ndaj Metës, ish-presidenti kërkon 134 dëshmitarë në GJKKO
Gramoz Toto është një emër i njohur për drejtësinë, pasi ka qenë subjekt i Operacionit Forca e Ligjit (OFL) për shkak të së kaluarës së tij kriminale.
