Një nga projektet rrugore më ambicioze dhe më të kushtueshme në botë po merr formë në Ishullin Reunion, territor francez në Oqeanin Indian.
Bëhet fjalë për autostradën Nouvelle Route du Littoral, një infrastrukturë e ndërtuar kryesisht mbi det, e krijuar për të zëvendësuar një nga rrugët më të rrezikshme të ishullit.
Me një kosto që arrin deri në 200 milionë euro për kilometër, projekti renditet ndër më të shtrenjtët në botë. Rruga ka një gjatësi totale prej rreth 12 kilometrash dhe lidh kryeqytetin Saint-Denis me portin La Possession, ndërsa pjesa më e madhe e saj kalon mbi Oqeanin Indian. Segmenti kryesor është në funksion që nga viti 2022, ndërsa përfundimi i plotë i projektit pritet në vitin 2030.
Pjesa më spektakolare e autostradës është një pjese 5.4 kilometra i gjatë, i mbështetur mbi shtylla të ndërtuara në fundin e detit. Projekti përfshin gjashtë korsi qarkullimi, një korridor të dedikuar për transportin publik, si dhe një shteg për këmbësorë dhe biçikleta.
Ndërtimi është konsideruar një sfidë e jashtëzakonshme inxhinierike, pasi është realizuar në kushte të vështira detare dhe në një zonë të ekspozuar ndaj cikloneve tropikale dhe dallgëve të fuqishme.
Nevoja për këtë autostradë lindi pasi rruga e vjetër bregdetare, Route du Littoral (RN1), kalonte poshtë shkëmbinjve të pjerrët, ku rrëshqitjet e dherave, rënia e gurëve dhe moti i keq shkaktonin bllokime të shpeshta dhe rrezik për drejtuesit e mjeteve.
Viadukti mbështetet mbi 48 shtylla të vendosura në fundin e detit, ndërsa për ndërtimin e tij janë përdorur më shumë se 1.300 elemente të parafabrikuara, të cilat janë montuar në vend.
Inxhinierët e kanë projektuar autostradën që t’i rezistojë cikloneve, dallgëve të mëdha dhe madje edhe përplasjeve të mundshme me anije. Jetëgjatësia e saj është vlerësuar rreth 100 vjet.
Sot, rreth 70 mijë automjete e përdorin çdo ditë segmentin e hapur të autostradës, e cila ka përmirësuar ndjeshëm sigurinë dhe lëvizjen në pjesën lindore të ishullit. Pas përfundimit të plotë, Nouvelle Route du Littoral pritet të garantojë një lidhje të sigurt dhe funksionale gjatë gjithë vitit, pavarësisht kushteve të motit.
