Stafi i shkollës ‘Osman Gjini’, kanë shprehur ngushëllimet, pas vdekjes së kolegut të tyre Qemal Çala. Përmes një postimi në rrjetet sociale ata thonë se 63-vjeçari ishte një mësues i përkushtuar dhe një koleg i nderuar.
“Me dhimbje të thellë mësojmë lajmin e trishtë për ndarjen tragjike nga jeta të kolegut tonë të nderuar, Mësues Qemal Çala.
Lajmi i ikjes së tij na ka tronditur dhe lënë pa fjalë. Një mësues i përkushtuar, një koleg i dashur dhe një njeri i mirë, do të mbetet gjithmonë në kujtesën dhe zemrat tona.
Ngushëllime të sinqerta familjes, të afërmve dhe të gjithë atyre që e deshën dhe e respektuan. U prehtë në paqe shpirti i tij!” thuhet në reagimin e shkollës në faqen në Facebook.
63-vjeçari ndërroi jetë pas aksidentit tragjik një ditë më parë në aksin Cërrik-Mollas, pranë fshatit Selvijas. Viktimë mbeti edhe një 22-vjeçar që udhtonte me Çalën.
