Ka nisur në Gjykatën e Posaçme (GJKKO) seanca e radhës e gjykimit në themel ndaj kryebashkiakut të Tiranës, Erion Veliaj, dhe personave të tjerë të pandehur në këtë proces.
Veliaj nuk është i pranishëm në sallën e gjyqit, pasi ka refuzuar të marrë pjesë në seancat gjyqësore për sa kohë që i mohohet kërkesa për të mos qëndruar në kafaz gjatë procesit.
Në sallë ndodhen dy prokurorët e SPAK, Altin Dumani dhe Ols Dado, ndërsa mungojnë të gjithë të pandehurit.
Mungon gjithashtu avokati i Veliajt, Plarent Ndreca, i cili ka depozituar kërkesë për shtyrjen e seancës, duke argumentuar se ndodhet në pamundësi objektive për të marrë pjesë, pasi ka një tjetër çështje në Gjykatën Civile të Tiranës. Sipas mbrojtjes, kjo seancë lidhet me çështjen ndaj Arbjan Maznikut.
Ndërkohë, në seancën e sotme nuk është paraqitur as bashkëshortja e Veliajt, Ajola Xoxa, e cila kishte kërkuar pezullimin e procesit me dy muaj, duke paraqitur raportin mjekësor pas lindjes. Kërkesa e saj u rrëzua nga GJKKO.
Avokatët e Xoxës, Gurali Brahimllari dhe Maksim Haxhia, po e përfaqësojnë atë në proces. Mbrojtja pretendon se pas lindjes me operacion, Xoxa nuk është në gjendje të ushtrojë në mënyrë efektive të drejtat e saj në procesin gjyqësor.
“Zonja Xoxa ka bërë konsultën tek mjeku, i cili ka konstatuar se ajo vazhdon të jetë në të njëjtën gjendje, duke e pasur të pamundur të bëjë mbrojtjen në këtë proces”, deklaroi avokati i saj.
Nga ana tjetër, Prokuroria e Posaçme ka kundërshtuar kërkesën për pezullim, duke argumentuar se ligji parashikon vetëm shtyrje të seancës dhe jo pezullim të procesit, ndërsa ka vënë në dukje se Xoxa nuk është paraqitur asnjëherë personalisht në gjyq.
GJKKO ka vendosur gjithashtu pezullimin e afateve të paraburgimit për Erion Veliajn, ndërsa procesi vijon mes mungesave të të pandehurve dhe kërkesave të mbrojtjes për shtyrje.
