Në lokalet e bregdetit nuk do të lejohet muzika me volum të lartë nga ora 20:00 deri në 24:00. Pas mesnate, muzika duhet të ndalojë. Udhëzimi i ri ka hyrë sot në fuqi, bëri të ditur ministri i Brendshëm, Besfort Lamallari, gjatë një vizite në Lezhë i cili tha se Policia e Shtetit dhe Bashkiakja do të marrin masa që niveli i zhurmës të mos tejkalohet dhe të garantohet qetësi për pushuesit.
“Kemi nënshkruar, së bashku me Ministrinë e Mjedisit dhe Ministrinë e Shëndetësisë, udhëzimin e ri për nivelin e zhurmave gjatë sezonit turistik. Ky udhëzim hyn në fuqi sot, me botimin në Fletoren Zyrtare. Nga ora 20:00 deri në 24:00, niveli maksimal i lejuar i zhurmës është 45 decibel në mjediset publike. Ndërsa nga ora 11:00 deri në 20:00, niveli i lejuar është 65 decibel.
Policia Bashkiake dhe Policia e Shtetit do të monitorojnë zbatimin e këtij udhëzimi dhe do të marrin masa që këto nivele të mos tejkalohen. Ne duam që pushuesit të gjejnë qetësi, si gjatë frekuentimit të lokaleve, ashtu edhe në ambientet e tjera. Çdokush që vjen me familjen për të pushuar në Shëngjin apo në zonat e tjera turistike të vendit duhet të ketë mundësi të pushojë pa u shqetësuar nga zhurmat. Ky udhëzim është hartuar në përputhje me standardet e Organizatës Botërore të Shëndetësisë për nivelin e lejuar të zhurmës”, tha Lamallari.
Nga ana e tij, kryetari i Bashkisë i Lezhë, Pjerin Ndreu, u shpreh se bashkëpunimi me Policinë e Shtetit ka sjellë rritje të rendit dhe sigurisë publike, duke ndikuar drejtpërdrejt në një sezon turistik të suksesshëm. Ai vlerësoi gjithashtu aktin normativ të qeverisë për minimizimin e zhurmave në zonat turistike.
Gjatë vizitës në Lezhë, ministri i Brendshëm Besfort Lamallari, i shoqëruar nga drejtori i përgjithshëm i Policisë së Shtetit, Skënder Hita, zhvilloi një takim në Bashkinë e Lezhës. Në fokus të diskutimeve ishte forcimi i mëtejshëm i bashkëpunimit dhe rritja e efikasitetit të institucioneve për të garantuar një sezon të qetë dhe të sigurt për të gjithë pushuesit që zgjedhin bregdetin e Lezhës këtë verë.
Read more:“Babai im ka kancer”, Drake bën rrëfimin prekës në këngën e re
Siguria në plazhin e Shëngjinit, Hita: 357 shoferë të ndëshkuar në fundjavë, me shpejtësi deri në 200 km/h! Respektoni rregullat e qarkullimit
Ministri i Punëve të Brendshme, Besfort Lamallari, i shoqëruar nga Drejtori i Përgjithshëm i Policisë së Shtetit, Skënder Hita, inspektoi zbatimin e masave të sigurisë në zonën e Shëngjinit, në kuadër të sezonit turistik.
Gjatë inspektimit, Drejtori i Përgjithshëm i Policisë së Shtetit falënderoi punonjësit e Policisë Rrugore të Kosovës, të cilët janë në shërbim të përbashkët me kolegët e Policisë Rrugore shqiptare në zonën e Shëngjinit, në kuadër të bashkëpunimit për garantimin e sigurisë rrugore gjatë sezonit turistik.
Read more:Zjarr i përmasave të mëdha në pyllin e Sodës, rrezikohen sipërfaqe me pisha(VIDEO)
Njëkohësisht, ai vlerësoi angazhimin dhe përkushtimin e të gjitha strukturave të Policisë së Shtetit, të cilat, me orë të zgjatura shërbimi dhe sakrificë të përditshme, garantojnë sigurinë e qytetarëve dhe vizitorëve në të gjithë vendin.
Drejtori i Përgjithshëm theksoi se siguria rrugore gjatë sezonit turistik mbetet një nga prioritetet kryesore të Policisë së Shtetit, ndaj janë intensifikuar kontrollet dhe është shtuar përdorimi i mjeteve inteligjente në të gjitha akset rrugore.
Read more:Lezha vendos çmimin e plazheve, 3 euro në ato publike dhe deri në 20 euro te privatët
“Vetëm gjatë fundjavës janë ndëshkuar 357 drejtues automjetesh për tejkalim të shpejtësisë, me shpejtësi të konstatuara që varionin nga 150 km/h deri në mbi 200 km/h. U bëj apel të gjithë përdoruesve të rrugës që të respektojnë kufijtë e lejuar të shpejtësisë, sinjalistikën rrugore dhe të gjitha rregullat e qarkullimit, pasi shpejtësia mbetet një nga shkaqet kryesore të aksidenteve rrugore me pasoja fatale”, tha Hita.
Drejtori i Përgjithshëm u ndal edhe te problematika e ndotjes akustike, duke vlerësuar punën e Drejtorisë Vendore të Policisë Lezhë për kontrollet e vazhdueshme dhe matjet e nivelit të zhurmës me pajisje të specializuara.
Ai kërkoi nga strukturat e Policisë së Lezhës, si dhe nga të gjitha strukturat policore në vend, që të intensifikojnë kontrollet, në zbatim të ligjit dhe të udhëzimeve të dhëna, me qëllim garantimin e qetësisë publike, respektimin e normave të zhurmës dhe krijimin e kushteve sa më të mira për banorët dhe pushuesit në të gjitha zonat turistike të vendit.
