Prej muajsh, mijëra qytetarë po protestojnë në Shqipëri. Shkak u bë projekti për ndërtimin e një resorti luksoz nga Jared Kushner, dhëndri i Donald Trump, në një lagunë të mbrojtur ku jetojnë flamingot. Por tashmë protestat kanë marrë një dimension më të gjerë: korrupsioni, shpërdorimi i pushtetit dhe shitja e interesave të vendit. Nëse “Revolucioni i Flamingove” mund ta rrezikojë kryeministrin Edi Rama, e shpjegon korrespondenti i DW-së, Miodrag Soric.
DW
Protestat masive që prej javësh zhvillohen në Shqipëri kanë tërhequr vëmendjen e medias ndërkombëtare. Në një reportazh të realizuar nga korrespondenti i Deutsche Welle, Miodrag Soric, me titull “Korrupsioni, familja Trump, flamingot: Pse Shqipëria ka dalë në rrugë”, analizohet se si një protestë e nisur për mbrojtjen e mjedisit është shndërruar në një lëvizje më të gjerë kundër korrupsionit, shpërdorimit të pushtetit dhe mënyrës së qeverisjes.
Sipas reportazhit, shkëndija e protestave ishte projekti për ndërtimin e një resorti luksoz nga Jared Kushner, dhëndri i presidentit amerikan Donald Trump, në zonën e mbrojtur të Nartë-Vjosës, habitat i flamingove dhe dhjetëra specieve të mbrojtura. Megjithatë, protestat nuk kufizohen më vetëm te kundërshtimi i këtij investimi, por janë shndërruar në një revoltë qytetare kundër korrupsionit, klientelizmit dhe modelit të qeverisjes në Shqipëri.
Në reportazh theksohet se shumë të rinj po largohen nga Shqipëria për shkak të mungesës së perspektivës, ndërsa korrupsioni dhe përqendrimi i pushtetit shihen si faktorë që kanë ushqyer pakënaqësinë qytetare.
DW ndalet edhe te dilema mes zhvillimit ekonomik dhe mbrojtjes së natyrës, duke ngritur pyetjen nëse investimet e huaja justifikojnë ndërhyrjet në zona të mbrojtura.
Korrespondenti Miodrag Soric analizon gjithashtu pozitën politike të kryeministrit Edi Rama, rolin e opozitës dhe mungesën, sipas tij, të një alternative të fortë politike. Reportazhi trajton edhe mundësinë e presionit të Bashkimit Evropian ndaj Shqipërisë, si dhe rolin që mund të luajnë institucionet e drejtësisë dhe antikorrupsionit në lidhje me projektin e debatueshëm turistik.
Në përfundim, DW vëren se “Revolucioni i Flamingove” ka kaluar kufijtë e një proteste mjedisore dhe është shndërruar në simbol të pakënaqësisë ndaj mënyrës së qeverisjes, ndërsa mbetet për t’u parë nëse kjo lëvizje do të ketë ndikim në zhvillimet politike në vend.
