Banorë të bashkive të cilat sipas hartës territoriale të propozuar nga PS, shkrihen, e kundërshtuan këtë projekt, duke thënë se përveç vështirësive për të marrë shërbime, do ndikonte negativisht edhe në zhvillimin e zonave të tyre.
Punonjësit e bashkisë së Klosit bojkotuan punën për disa momente këtë paradite, në shenjë proteste kjo kundër shkrirjes së bashkisë dhe bashkimit të Klosit me Matin.
“Mirë na e bën Edi Rama, na e ka prerë biletën e varrimit dhe qytetarët janë të frikësuar të kërkojnë të drejtën e vetë. U bë Rruga e Arbrit, tani duhet të shkojmë prapë nga Shkopeti. Me 3 mijë lekë të vjetra unë shkoj në Tiranë jo të shkojë në Burrel të paguaj taksat”, thotë një qytetar.
“Klosi është një zonë në zhvillim, sidomos me hapjen e rrugës së Arbrit. Bashkia Klos duhet të funksionojë meqë dhe parametrat janë në rritje. Kam frikë se me bashkimin me Matin do preket dhe arsimi, do të ketë ndikim edhe në shpopullim, do të jetë më keq. Ata e kanë menduar për mirë ndoshta, por ne nuk kemi më shpresë, sidomos të rinjtë për të jetuar këtu”, thotë një tjetër
“Më mirë të na çojnë me Tiranën. Ne nuk do marrim pjesë në votime nëse këta na bashkojnë me Burrelin, nuk kemi asnjë leverdi me Burrelin. Kjo është lojë që bënë dy partitë bashkë”, thekson një banor.
“Klosi nuk është thjesht një territor në hartë. Bashkia Klos përbëhet nga 4 njësi administrative. Ekziston rreziku që vendimmarrja të përqendrohet larg qytetarëve të Klosit, duke e bërë më të vështirë zgjidhjen e problemeve të përditshme. Në vitet e fundit Bashkia Klos ka realizuar investime të ndryshme në infrastrukturë, ujësjellës, arsim dhe shërbime publike, investime që tregojnë se bashkia është në gjendje të zhvillojë dhe ofrojë shërbime për qytetarët e saj. Një bashkim i tillë mund të zbehë komunitetin tonë. Ne kërkojmë që Klos të mbetet njësi e pavarur e qeverisjes vendore”, thotë një qytetare
Qytetarët e Patosit kundërshtuan mundësinë që bashkia e tyre të shkrihet në një me Fierin
“Qytetit të naftës dhe intelektualëve nuk meriton t’i preket identiteti dhe dinjiteti”, thonë ata duke kërkuar nga qeveria që të heqë dorë nga çdo plan që prek bashkinë e tyre.
Sipas banorëve çdo ndryshim i statusit administrativ të Patosit do të ndikonte negativisht në zhvillimin e qytetit dhe në përditshmërinë e tyre pasi do t’i vështirësonte marrjen e shërbimeve.
“Është një bashki e madhe që nuk i bie radha kurrë, jo Patosit, por as rrethinave që tu ofrojnë shërbim”, thekson një qytetar.
Edhe votues tradicionalë të Partisë Socialiste i kanë konsideruar “gafë” ndryshimet e parashikuara nga Reforma e re Territoriale.
“Qyteti i Patosit ka qenë gjithmonë pro Partisë Socialiste dhe nuk e prisnim ne qytetarët e Patosit të na ndëshkonte Partia Socialiste kështu” , thotë një banor
“Jam me qeverinë dhe do votoj sa të jem gjallë për Partinë Socialiste, kjo është gafa më e rëndë për mua”, shprehte një qytetar.
Sipas ndarjes së re territoriale, Bashkia e Selenicës nuk do të ekzistojë më, pasi do të bashkohet me Vlorën.
Banorët e kundërshtojnë këtë vendim, duke thënë se shkrirja me Vlorën do të sjellë vetëm vështirësi.
Sipas tyre, edhe për dokumentin më të thjeshtë do të duhet të udhëtojnë drejt qytetit bregdetar, ku jo çdokush i ka mundësitë apo posedon një automjet.
Sipas banorëve, nuk mund të fshish nga harta një bashki e cila në territorin e saj ka 47 fshatra dhe mijëra banorë që jetojnë në to.
Banorët e përshkruajnë Selenicën si një qytet historik, teksa thonë se largimi i bashkisë do të stimulojë më tepër braktisjen e zonës.
