Aktivistja Sidorela Vatnikaj ka folur nga protesta e zhvilluar para Kryeministrisë, duke deklaruar se pas 68 ditësh tubime qytetare ka nisur një ndryshim i madh në shoqërinë shqiptare.
Vatnikaj u shpreh se qytetarët janë bashkuar përtej ndarjeve krahinore dhe politike, me synimin për të kërkuar një Shqipëri më të lirë dhe më të drejtë.
“Përtej dallimeve krahinore, ne duam që së bashku të bëjmë një Shqipëri jo vetëm të re, por të lirë. Luftëtarët që ka prodhuar kjo shoqëri, kjo tokë, na kanë bërë të kuptojmë se si është ndërtuar lufta kundër korrupsionit, kundër dhunës policore, kundër oligarkisë dhe medias së shitur”, deklaroi ajo.
Sipas aktivistes, protestat do të vijojnë deri në realizimin e kërkesave të qytetarëve, duke theksuar se sheshi nuk do të braktiset.
“Vijmë në këtë shesh çdo ditë sepse kërkesat tona nuk janë realizuar dhe nuk e lëshojmë sheshin pa u realizuar ato”, tha Vatnikaj. Ajo renditi edhe kërkesat kryesore të protestuesve, mes të cilave përmendi dorëheqjen e kryeministrit Edi Rama dhe kabinetit qeveritar, si dhe ndryshime në politikat që lidhen me menaxhimin e pasurive publike.
“Kërkesa jonë e parë është dorëheqja e kryeministrit Rama dhe kabinetit të tij qeveritar. Së dyti, kërkojmë shfuqizimin e të gjitha ligjeve që privatizojnë të mirat publike dhe shfuqizimin e ligjit për investitorët”, u shpreh aktivistja.
