Në Njësinë Administrative Libonik është zhvilluar takimi i parë konsultues me banorët në kuadër të reformës së re administrativo-territoriale, ku Bashkia Maliq propozohet të bashkohet me Bashkinë Korçë.
Takimi u organizua nga Këshilli Bashkiak Maliq në bashkëpunim me ekzekutivin vendor, me qëllim marrjen e mendimit të qytetarëve përpara se këshilli të përcaktojë qëndrimin zyrtar për këtë propozim. Pjesëmarrja nuk ishte masive, ndërsa banorët e pranishëm shprehën qëndrime të ndryshme, me disa prej tyre pro bashkimit dhe të tjerë kundër.
“Nuk duhet ta lejojmë të humbasë bashkia. Ne na largohet shërbimi. Unë nuk e kam problem Korçën se atje rri çdo ditë, por ai që që do vijë nga fshatrat e largëta do të duhet të flejë në hotel. Ne ngritëm institucione, kemi bërë Bashkinë për mrekulli. Po nuk ndenji njeri në shtëpi, shtëpia shkatërrohet. Mos ndiqni më politikën për hallet tuaja por veten” tha Faslli Zholi anetar i këshillit bashkiak.
Kryetari i Këshillit Bashkiak Maliq deklaroi se vendimmarrja do të bazohet në opinionin e qytetarëve, duke theksuar se përpara se këshilli të shprehet pro ose kundër bashkimit me Korçën, është e nevojshme të dëgjohet zëri i komunitetit.
Vetë kreu i këshillit është shprehur kundër bashkimit me Korçën, duke argumentuar se shërbimet publike janë më efektive kur janë më pranë qytetarëve dhe se Bashkia Maliq duhet të vijojë të funksionojë si njësi më vete.
“Ishte një dëgjesë publike në kuadër të reformës territoriale. Keshilli Bashkiak i Maliqit vendosi që para se të shprehet pro apo kundër bashkimit me Korccën vendosi të pyesë qytetarët. Do të vijojmë me njësi të tjera me takime të tilla. Ne do t’i përcjellim shqetësimet tona kuvendit. Qytetarët kanë të drejtë të dëgjohen dhe të shprehin mendimin e tyre. Unë dëgjoj qytetarët dhe jam në krah të mendimit të tyre. Si banor i Maliqit jam kundër për sa kohë që mendohet se shërbimet janë më cilësore kur janë pranë qytetarit” tha ai.
Banorët e pranishëm në takim patën qëndrime të ndryshme përballë propozimit për bashkimin e Bashkisë Maliq me Bashkinë Korçë.
“Nëse qytetarët nuk vbijnë vërdallë për një shërbim, për mua nuk ka rëndësi fare, rëndësi ka tu shërbejmë qytetarëve” tha një prej tyre
Një pjesë u shprehën kundër bashkimit, duke ngritur shqetësimin se ndryshimi mund të sjellë largimin e shërbimeve nga qytetarët dhe vështirësi më të mëdha për banorët e njësive administrative.
Nga ana tjetër, pati edhe banorë që e shohin bashkimin si një mundësi për më shumë investime, shërbime dhe zhvillim të zonës.
“Unë mendoj që të mbyllet, përjashto shërbimet që duhet të jenë në territor, pjesa tjetër të mbyllet. Maliqi ka qenë lokalitet. Nuk do bëhëet gjë e madhe. Të paktën të ulen ca taksa. Paguaj taksa 5 milionë lek dhe akoma duan të rrijnë këtu? Le të ikin” tha njëri prej tyre.
“Unë nuk dua që Bashkia të prishet sepse nuk kemi mundësi…ne nuk na realizohen ato që kërkojmë duke i pasur këtu , jo më kur të shkrihet. Ne nuk duam të shkrihet. Kryetari i Bashkisë së Maliqit është njeri i ndershëm” tha një grua.
Konsultimet do të vijojnë edhe në njësitë e tjera administrative të Bashkisë Maliq, ndërsa më 20 gusht pritet të zhvillohet mbledhja e posaçme e Këshillit Bashkiak, ku do të miratohet qëndrimi zyrtar për reformën territoriale. Ky qëndrim më pas do t’i përcillet Kuvendit të Shqipërisë.
