Gazetari i News24, Osman Stafa, iu drejtua protestuesve në ditën e 76-të të protestës, duke e cilësuar tubimin si një nga momentet më të rëndësishme të historisë së vendit.
Ai theksoi se këtë herë sheshi nuk është mbushur nga partitë politike, por nga qytetarët.
Një pjesë të veçantë të fjalimit ia kushtoi diasporës shqiptare, e cila udhëtoi nga vende të ndryshme të botës për t’iu bashkuar protestës. Sipas tij, largimi i shqiptarëve nga vendi është pasojë e politikave që nuk u kanë dhënë mundësi të ndërtojnë të ardhmen në Shqipëri.
Stafa falënderoi diasporën për pjesëmarrjen në protestë dhe theksoi se tubimet e shqiptarëve jashtë vendit kanë marrë një rëndësi të veçantë. Ai ngriti gjithashtu shqetësimin për gjendjen e sistemit shëndetësor, duke përmendur rastet e pacientëve që, sipas tij, përballen me mungesë të trajtimit të duhur.
Në fund, gazetari iu drejtua protestuesve duke theksuar se temperaturat e larta nuk i kanë ndalur dhe paralajmëroi një vjeshtë të fortë politike.
“Kjo protestë është më e bukura që ka parë historia. 76 ditë nuk janë numra që këta duan t’i shesin, por është historia më e bukur që ka parë vendi në gjithë historinë e saj. Ju nuk jeni vetëm protestues, por misionarë, që nuk i ka parë vendi në gjithë historinë e tij. Është fatkeqësi që këto sheshe i ka mbushur partia, por këtë herë i ka mbushur Shqipëria. Ky shesh nuk e duron dot më vjedhjen, shpopullimin. Qytetarë, nuk jeni vetëm kaq, por sa shumë mbështetje, sa shumë zemra janë në këtë protestë. Diaspora erdhi, zemra e Shqipërisë. Diaspora, e cila u detyrua që të largohej nga Shqipëria. Ata që shoqërova që nga Stacioni i Trenit, ishin këta të rinj, por kishin dashurinë për Shqipërinë dhe fluturuan me mijëra kilometra për të valëvitur flamurin kuqezi. Politika i largoi nga vendi, nuk i la që të ndërtonin familjen e tyre, të ardhmen. Diaspora ka për t’ua kthyer reston këtyre. Këta i larguan. Prindërit nuk kanë mundësi që të shohin fëmijët e tyre. Edhe kur ikin në botën tjetër, ikin me brenga. Sa shumë mesazhe kam marrë këto kohë të atyre prindërve që rrisin fëmijët jashtë dhe kanë brenga për prindërit e tyre. Faleminderit diasporë, që nuk e braktisni këtë komb. Është historike kjo protestë që ndodhi në Shqipëri, në këtë shesh. Është kaq historike protesta që bën diaspora në çdo shtet. Nuk janë korba, zorra, por më të bukurit e flamurit kuqezi! Sikur të ishin ngritur shqiptarët vetëm për spitalet, për Onkologjikun apo Neurologjinë. A ka fund më të trishtueshëm për një njeri që jeton dhe punon në Shqipëri dhe kur shkon me goditje në kokë i japin një zgjidhje: ose vdis, ose paralizohu! Jemi në ditët më të nxehta të verës, por si trembi shqiptarët? I ka bërë që të prishin planet dhe të jenë këtu në shesh. Më besoni, më shumë se kjo nxehtësi, nxehtësinë reale e ndjejnë këta këtu, politikanët, pasi po vjen shtatori. Shtatori do të jetë për Shqipërinë, jo për partinë.”, tha ai.
