Vetëm 4 vatra zjarri aktive në vend, 2 helikopterë në ‘luftë’ me flakët! Vijon ndërhyrja në Dajt, Priskë, Lufaj e Tërbun
Ministria e Mbrojtjes ka njoftuar se deri në orën 14:00 në Shqipëri ka pasur gjithsej 6 vatra zjarri, 4 prej të cilave vijojnë të jenë aktive, ndërsa 2 të tjera në monitorim.
Në terren janë angazhuar 126 forca operacionale vendore, ndërsa Forcat e Armatosura vijojnë të mbështesin operacionet me 90 efektivë dhe dy helikopterë të Forcës Ajrore.
Në Dajt të Tiranës, operacioni vijon me 50 efektivë të Forcave të Armatosura, 15 forca të Zjarrfikëses dhe 5 forca të AZM-së. Sipas Ministrisë së Mbrojtjes, aktualisht nuk ka rrezik për zonat e banuara.
Edhe në Priskë, Tiranë, forcat zjarrfikëse vijojnë ndërhyrjen pas riaktivizimit të vatrës së zjarrit. Fatmirësisht situata nuk paraqet rrezik për banesat.
Në Lufaj të Mirditës, zjarri mbetet aktiv me intensitet të ulët. Në terren ndodhen 8 forca të Shërbimit Pyjor dhe 4 zjarrfikës, të mbështetur nga një automjet zjarrfikës. Edhe në këtë zonë nuk raportohet rrezik për banesat.
Ndërkohë, në Tërbun të Pukës, operacioni vijon me forcat në terren, të cilat po punojnë për hapjen e korridoreve ndarëse pas përfundimit të ndërhyrjes nga ajri. Situata është nën kontroll dhe nuk ka rrezik për zonat e banuara.
Përmirësim i situatës raportohet edhe në Gurë-Lurë, ku zjarri është shuar dhe zona po mbahet nën monitorim. Në Qafë Helmes, vatra është izoluar dhe vijojnë operacionet me forcat lokale.
Ministria e Mbrojtjes bën me dije se strukturat e Mbrojtjes Civile vijojnë angazhimin dhe monitorimin në terren. Situata në vend paraqitet përgjithësisht e stabilizuar, ndërsa deri në këtë moment nuk raportohet rrezik për zonat e banuara.
Zjarri në Tërbun, flakët përhapen në Gojan i Vogël e Gjegjan, ndërhyjnë 3 helikopterë! Digjet një stan, rrezikohen 2 të tjerë (VIDEO)
Në Fushë-Lajë të Tërbunit, flakët po përpijnë gjithë sipërfaqen pyjore duke rrezikuar stanet dhe fshatrat Gojan i Vogël e Gjegjan. Prej dy ditësh, zjarri ka kaluar në pyjet e Kuzhnenit duke iu afruar staneve.
Një prej tyre është djegur, kurse 2 të tjerë rrezikohen. Bagëtitë janë evakuuar, ndërsa 3 helikopterë po punojnë për shuarjen e flakëve.
“Situata me zjarret boll keq është. Jemi detyruar të largojmë bagëtinë, kanë marrë masat, por është përhapur. Zjarr i fuqishëm shumë. Më ka dëmtuar bagëtitë, rrethimin.”
“Më shumë më dhimbset natyra sesa stani. Po kaloi rrugën, do të djegë gjithë fshatin. Është shumë i rrezikshëm për gjithë zonën”, thonë banorët.
Sipas specialistëve, mendohet të jenë rreth 120 hektarë të prekur, një pjesë e të cilëve pishë e zezë.
P.J/E.H/Shqiptarja.com
LAJMET MË TË VLERËSUARA