Riatdhesimet nga Siria, zv/ministrja: Kërkuan të vinin në Shqipëri! Fëmijët e ardhur më parë janë integruar në shkolla, bëjnë jetë normale

Tre fëmijë të moshave 9-17 vjeç dhe dy gra, Hajrije Taushani dhe Myrvete Dibra, u riatdhesuan nga Siria. Ata udhëtuan nga Siria drejt Stambollit dhe në mesnatë mbërritën në Tiranë.

Në një intervistë për Report Tv, zëvendës ministrja e Punëve të Jashtme, Megi Fino tha se këto janë riatdhesime vullnetare dhe operacione delikate.

“Në orët para të mëngjesit të sotëm përfundoi me sukses operacioni i tre fëmijëve dhe 2 grave. Ka qenë një angazhim i madh sepse janë opercione të ndërlikuara. Jemi shumë të kujdesshëm për këtë arsye. Kemi pasur komunikim të vazhdueshëm edhe me familjarët e tyre”, tha Fino.

Read more:Shkoi për të marrë nipin dhe mbesën pas vdekjes së djalit! 79-vjeçarja e riatdhesuar nga Siria, nëna e Sherit Taushanit i cili u vra si pjesë e ISIS

Fino nuk dha detaje se ku kanë qenë gratë e fëmijët e riatdhesuar, pas mbylljes së kampit famëkeq Al Hol, por theksoi se institucionet kanë qenë në komunikim të vazhdueshëm për sigurinë e tyre.

“Janë çështje të ndjeshme, por institucionet kanë qenë gjithmonë në komunikim për sigurinë e tyre. Të gjithë ata kanë një histori të veçantë. Pasi kanë mbërritur kanë bërë vizita mjekësore, dhe vizita psiko-sociale. Jemi shumë të kujdesshëm përderisa kemi të mitur”, tha Fino.

Zv/ministrja Fino nënvizoi se deri tani janë zhvilluar 6 operacione të suksesshme.

Read more:Riatdhesohen nga kampet e ferrit në Siri 2 gra e 3 fëmijë! Mes tyre 79-vjeçarja që shkoi për nipërit pasi i biri iu vra në luftë, mbi një dekadë u kujdes për jetimët në ‘Al-Hol’ (VIDEO)

“Këto janë riatdhesime vullnetare dhe ky është një operacion shumë dinamik. Janë zhvilluar 6 operacione të sukseshme. Situata është dinamika, nuk është gjithmonë kaq e lehtë për të vepruar. Nuk mund të japim shifra konkrete edhe sa shqiptarë ndodhen në Siri, por strukturat tona janë të angazhuara dhe ne jemi në kontakte të vazhdueshme”, shtoi Fino.

Ndërsa u pyet nga gazetari i Report Tv Nertil Agalliu se sa e vështirë është që të riintegrohen në shoqëri, pas riatdhesimit, Fino tha se bëhet një punë shumë e madhe.

“Bëhet një vlerësim i të gjithëve dhe më pas vijohet puna për t’i riintegruar plotësisht në shoqëri. Kanë qenë të suksesshme përshtatja e fëmijëve në shkolla dhe vazhdimi normal i jetës në Shqipëri”, tha Fino.

Read more:Dy gra e tre fëmijë shqiptarë riatdhesohen nga kampet e ‘ferrit’ në Siri, mbërritën në Tiranë pak pas mesnate (VIDEO)

Në fund të intervistës Fino tha se për këtë operacion është punuar prej disa javësh.

“Çdo veprim i joni udhëhiqet nga interesi i tyre për tu rikthyer. Megjithatë duhet bashkëpunim institucional”, tha ajo.