‘Smart City’ në shkollat e Tiranës prej shtatorit, Lamallari tek gjimnazi ‘Qemal Stafa’: Janë instaluar kamerat me inteligjencë artificiale, më shumë siguri për nxënësit

Ministri i Punëve të Brendshme, Besfort Lamallari, vizitoi ditën e sotme gjimnazin “Qemal Stafa”, një prej institucioneve arsimore ku ka nisur zbatimi i programit “Smart City” për rritjen e sigurisë në shkolla.

Ai pa nga afër sistemin e kamerave të instaluara në ambientet e shkollës, duke theksuar se teknologjia e avancuar dhe inteligjenca artificiale do të jenë tashmë pjesë e masave për një mjedis më të sigurt për nxënësit dhe stafet pedagogjike.

“Jemi këtu për të parë nga afër pikërisht fillimin e zbatimit të programit ‘Smart City’ për sigurinë në shkolla”, u shpreh Lamallari, duke shtuar se gjimnazi “Qemal Stafa” dhe nxënësit e tij do të jenë ndër të parët që do të përfitojnë nga siguria e shtuar përmes teknologjisë.

Read more:Ministri Lamallari publikon pamje: Akset rrugore po monitorohen me dronë, radarë dhe mjete inteligjente! Qëllimi, evidentimi i shkeljeve (VIDEO)

Sipas ministrit, sistemi i ri kombinon teknologjinë e avancuar me përdorimin e inteligjencës artificiale, duke i shtuar një tjetër dimension masave të sigurisë në institucionet arsimore.

“Kjo nënkupton shumë siguri, jo vetëm për nxënësit, por edhe qetësi për prindërit e këtyre nxënësve”, theksoi Lamallari.

Ministri nënvizoi se teknologjia do të kombinohet me praninë fizike të Policisë së Shtetit në shkolla. Në gjimnazin “Qemal Stafa” aktualisht shërbejnë dy oficerë policie, të cilët do të vijojnë të jenë pjesë e masave të sigurisë gjatë vitit të ri shkollor.

Read more:Policia forcon kontrollet me teknologjinë, Lamallari: Smart City do të rrisë sigurinë rrugore dhe publike (VIDEO)

“Kjo i shtohet përpjekjeve të qeverisë shqiptare, krahas oficerëve të policisë në shkolla”, tha Lamallari, duke theksuar se teknologjia dhe prania policore do të funksionojnë së bashku për garantimin e sigurisë.

“Nga data 14 shtator, kur fillon edhe viti i ri, urojmë vetëm suksese. Siguria është përgjegjësia jonë”, u shpreh ministri.

Drejtoresha e gjimnazit “Qemal Stafa” vlerësoi mbështetjen për forcimin e sigurisë në shkollë.

Read more:“Po mbledhim firma për ta shpallur Ramën të rrezikshëm”/ Protestuesi nga Gjermani: Në 25 vite nuk ka ndryshuar asgjë. Blihet ende uji me autobot dhe s’ka rrugë

“Edukimi cilësor ecën më së miri edhe me mjedise më të sigurta, të cilat në shkollën tonë janë krijuar më së miri”, u shpreh ajo.

Zbatimi i teknologjive të reja të sigurisë në shkolla synon të krijojë një mjedis më të mbrojtur për nxënësit dhe mësuesit, duke i dhënë prindërve më shumë siguri dhe besim në nisjen e vitit të ri shkollor.