TIRANË– Një 40-vjeçar është ndaluar si pjesë e grupit që kishin ngritur një skemë mashtrimi të sofistikuar dhe i zhvatën 100 mijë euro një kambisti 70-vjeçar duke u shtirur si biznesmeni dhe botuesi Bashkim Ulaj. Gjashtë ditë pas zbulimit të skemës, Policia e Tiranës ka zbuluar se pjesë e grupit ishte edhe Agron Cena, ndërsa në kërkim është ende 31-vjeçari Rigels Hyseni.
“Është identifikuar dhe ndaluar një 40-vjeçar, në kuadër të operacionit policor “Shuma”. Ky shtetas, më datë 22.08.2026, ka marrë, në ambientet e një subjekti të këmbimit valutor në Tiranë, shumën prej 100 000 eurosh, e cila i ishte marrë nëpërmjet mashtrimit një 70-vjeçari”, njofton Policia.
Autorët dyshohet se përdorën inteligjencën artificiale për t’i marrë 100 mijë euro pronarit të një pike këmbimi valutor në Tiranë. Fillimisht, ata i dërguan mesazhe 70-vjeçarit duke iu prezantuar si një person i njohur i tij. Për ta bindur më tej, duke përdorur një telefonatë në videocall, ku përmes inteligjencës artificiale manipuluan pamjen për t’i shfaqur kambistit fytyrën e biznesmenit Bashkim Ulaj, me të cilin 70-vjeçari kishte njohje.
Autorët pretenduan se paratë do t’ia kthenin brenda pak orësh. Pasi afati i premtuar kaloi dhe paratë nuk u kthyen, kambisti telefonoi numrin nga i cili komunikuan, por ishte i bllokuar. Më pas bëri kallëzimin në polici dhe në pranga shkuan edhe Brian Serica, 31 vjeç, dhe Skerdi Meta, 23 vjeç.
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
