Fundjava e parë e shtatorit ka risjellë fluksin në doganën e Morinës. Moti me diell, ka bërë që pushuesit nga Kosova t’i shfrytëzojnë për plazh në Shëngjin e Velipojë por dhe në qytete të tjera.
Temperaturat e larta të ditëve të fundit duket se kanë ndikuar në këtë lëvizje, duke bërë që shumë familje nga Kosova të zgjedhin bregdetin shqiptar për të kaluar fundjavën.
Sipas të dhënave të Drejtorisë për Kufirin dhe Migracionin Kukës, në Stacionin e Policisë Kufitare Morinë, vetëm gjatë intervalit kohor nga ora 05:00 deri në 09:15 të datës 5 shtator 2026, kanë hyrë në Republikën e Shqipërisë 15 mijë e 823 qytetarë të Kosovës.
Fluksi është shoqëruar edhe me një numër të konsiderueshëm automjetesh. Në të njëjtin hark kohor, në territorin shqiptar kanë hyrë 4 mijë e 107 mjete të vogla dhe autobusë.
Read more:Ditë me vranësira, por me temperatura deri në 37 gradë celcius…parashikimi i motit për sot (VIDEO)
Shifrat tregojnë se, pavarësisht përfundimit të sezonit veror, interesi i qytetarëve të Kosovës për bregdetin shqiptar vijon të jetë i lartë, veçanërisht gjatë fundjavave dhe në kushtet e temperaturave ende të larta.
