11 vatra vijojnë ende të jenë aktive dhe 5 të tjera janë nën mbikëqyrje, sipas bilancit të 24 orëve të fundit.
Fieri vijon të jetë vatër problematike ku veç angazhimit të 13 automjete zjarrfikëse e 4 autoboteve, po ndërhyhet me një helikopter dhe një avion ‘Air Tractor.’
Në malin e Dajtit janë angazhuar 77 forca ushtarake dhe 1 helikopter.
Në Bardhaj të Shkodrës, janë angazhuar 6 automjete zjarrfikëse, forca të shumta si dhe 1 helikopter. Në Tërbun ka një vatër të re zjarri, pas flakëve që përfshinë një sipërfaqe prej 3 mijë hektarësh disa ditë më parë.
Për ditën e sotme është parashikuar angazhimi i 160 forcave ushtarake në zonat ku ndërhyrja vijon.
Lajm në përditësim…
Rindezet zjarri në masivin pyjor të Terbunit, dyshohet i qëllimshëm! Zjarrfikësit nisen drejt vatrës së re
Një vatër e re zjarri është shfaqur në masivin pyjor të Terbunit, vetëm pak ditë pasi flakët përfshinë zonën duke djegur rreth 3 mijë hektarë sipërfaqe pyjore. Sipas informacionit paraprak, zjarri dyshohet të jetë i qëllimshëm.
Ngjarja ndodh në një kohë kur Bashkia ka hapur konsultimet për instalimin e parkut eolik në këtë zonë.
Shërbimi zjarrfikës, i angazhuar edhe në vatra të tjera zjarri, është nisur drejt Terbunit për të ndërhyrë dhe për të vënë nën kontroll flakët.
