Këshilltari strategjik amerikan Mark J. Finlay, ka folur për rolin dhe interesin e Shteteve të Bashkuara në Shqipëri dhe në rajonin e Ballkanit Perëndimor.
Në një intervistë për News24, ai nënvizoi se Uashingtoni e konsideron rajonin të rëndësishëm dhe vijon të jetë i angazhuar në çështjet që lidhen me paqen, stabilitetin dhe forcimin e institucioneve demokratike. Finlay tha se vëmendja amerikane nuk kufizohet vetëm te politika e jashtme, pasi sipas tij edhe në Kongresin amerikan ka përfaqësues që ndjekin nga afër zhvillimet shqiptare. Ai solli si shembull komunikimin e fundit me një kongresmen amerikan, duke theksuar se mesazhi i marrë prej tij ishte një shprehje mbështetjeje dhe inkurajimi për Shqipërinë.
“SHBA është shumë e interesuar në këtë vend, shumë e interesuar në Ballkanin Perëndimor. Është e përfshirë në procesin e paqes dhe në zhvillimin demokratik të shoqërisë. Unë mendoj se ka anëtarë të Kongresit që janë veçanërisht të ndërgjegjshëm dhe ka një interes të madh se çfarë po ndodh në Shqipëri. Madje po diskutoja me një nga kongresmenët, që jam në Shqipëri dhe m’u përgjigj sot në mëngjes: Zoti e bekoftë Shqipërinë. Faleminderit për punën tuaj, inkurajoni miqtë tanë”, deklaroi Mark J. Finlay për News24.
Duke u ndalur te rruga e Shqipërisë drejt Bashkimit Evropian, Finlay theksoi se anëtarësimi kërkon përmbushjen e kritereve dhe avancimin konkret të reformave. Sipas tij, procesi i integrimit duhet të vijojë pa hapa pas, ndërsa rezultatet duhet të jenë të prekshme për qytetarët shqiptarë. Ai veçoi veçanërisht luftën kundër korrupsionit, funksionimin e drejtësisë dhe krijimin e mundësive më të mira për qytetarët si fusha ku pritet progres.
“Shqipëria do të kalojë në një proces të hapjes dhe mbylljes së negociatave. Njerëzit në Shqipëri duan të shohin përmirësim në çështje si korrupsioni, drejtësi dhe mundësi. Mendoj se një proces tërësor është i lirë dhe nuk dua të shoh Shqipërinë që të ecë prapa sa i takon afateve për tu bërë një anëtar i plotë, por progresi duhet bërë”, tha ai.
Finlay nënvizoi kështu rëndësinë e vijimit të reformave dhe rezultateve konkrete, duke e lidhur përparimin e Shqipërisë drejt BE-së jo vetëm me përmbushjen formale të kushteve, por edhe me përmirësimin e situatës për qytetarët.
