Kreu i Grupit Parlamentar të Partisë së Lirisë, Tedi Blushi, ka kërkuar zhvillimin e një interpelance me Ministrin e Financave, me fokus te politikat fiskale të qeverisë dhe masat për uljen e çmimeve të ushqimeve e karburanteve, si dhe rritjen e pagave dhe pensioneve.
Në kërkesën e tij, Blushi argumenton se familjet shqiptare po përballen me një rritje të vazhdueshme të kostos së jetesës, ndërsa politika fiskale e qeverisë, sipas tij, nuk po ofron një përgjigje në përputhje me barrën ekonomike që përballojnë qytetarët.
Ai i referohet të dhënave të Eurostat, sipas të cilave në muajin korrik çmimet e ushqimeve në Shqipëri u rritën rreth 3.2%, kundrejt 0.6% në Bashkimin Europian. Sipas Blushit, kjo do të thotë se ushqimet në Shqipëri po shtrenjtohen me një ritëm më shumë se pesë herë më të lartë se mesatarja europiane.
Një tjetër shqetësim i ngritur prej tij lidhet me barrën fiskale mbi konsumin bazë dhe karburantet. Blushi kërkon të dijë përse Shqipëria vijon të aplikojë TVSH 20% për produktet bazë të konsumit, ndërsa, sipas tij, vendet e rajonit kanë norma më të ulëta.
Kreu i Grupit Parlamentar të Partisë së Lirisë e ka krahasuar situatën me vendet fqinje, duke sjellë në vëmendje masat e ndërmarra në Greqi, Mal të Zi dhe Maqedoninë e Veriut për uljen e kostos së jetesës dhe barrës fiskale.
Read more:Tedi Blushi: Greqia po ul çmimet, Rama po rrit taksat! TVSH-ja për ushqimet duhet të zbresë në 5%
Në kërkesën për interpelancë, Blushi ngre gjithashtu çështjen e çmimit të karburanteve. Sipas tij, nafta në Shqipëri kushton rreth 2.4 euro për litër, ndërsa në Maqedoninë e Veriut rreth 1.59 euro. Ai argumenton se diferenca në çmim ndikon drejtpërdrejt në transport, prodhim, shërbime dhe në koston finale të produkteve.
Partia e Lirisë, sipas Blushit, ka propozuar pezullimin e Taksës së Qarkullimit dhe Taksës së Karbonit, si dhe uljen e TVSH-së për shportën bazë të konsumit nga 20% në 5%.
Në kërkesën drejtuar Ministrit të Financave, Blushi kërkon përgjigje konkrete edhe për kostot që do të kishte një ulje e TVSH-së, ndikimin e saj të pritshëm në çmimet për konsumatorët dhe të ardhurat që Buxheti i Shtetit siguron nga taksat dhe akcizat mbi karburantet.
Ai kërkon gjithashtu të dijë nëse qeveria ka një plan konkret për reduktimin e barrës fiskale gjatë viteve 2026–2027 dhe cilat janë masat e parashikuara për rritjen e fuqisë blerëse të qytetarëve.
Një pjesë e kërkesës së interpelancës i kushtohet edhe pagave dhe pensioneve. Blushi kërkon të dijë se cilat janë masat konkrete që qeveria parashikon për rritjen e tyre në raport me rritjen reale të kostos së jetesës.
Read more:Pullat, dializa, sterilizimi, Kayo/ Si po shndërrohet shteti në një kompani gjigande guackë
Në përfundim, kreu i Grupit Parlamentar të Partisë së Lirisë kërkon nga Ministria e Financave një plan të matshëm, me objektiva dhe afate konkrete, për uljen e barrës fiskale mbi konsumin bazë dhe rritjen e fuqisë blerëse të familjeve shqiptare.
Sipas tij, interpelanca synon të marrë përgjigje të plota dhe të dokumentuara mbi një çështje që prek drejtpërdrejt mirëqenien ekonomike të qytetarëve dhe të qartësojë nëse qeveria është e gatshme të përdorë instrumentet fiskale për të frenuar rritjen e kostos së jetesës.
