Nevoja për të ardhura shtesë po bën që familjet shqiptare të mbështeten gjithnjë e më shumë te paratë që u dërgojnë të afërmit emigrantë.
Në gjashtë muajt e parë të vitit remitancat kanë arritur në një tjetër rekord por vlera e tyre për ekonominë vendase po dobësohet më shumë teksa euroja e dobët përballë lekut bën që e njëjta shumë në euro të këmbehet për më pak lekë në Shqipëri.
Në këtë realitet, emigrantët kanë dërguar 621.4 milionë euro në gjysmën e parë të vitit, 16.9% më shumë se një vit më parë. Vetëm në tremujorin e dytë dërgesat arritën në 347 milionë euro me një rritje prej rreth 24%.
Edhe shifra e gjashtëmujorit është më e larta e regjistruar në serinë e të dhënave që prej vitit 2008. Ndërsa në vetëm një vit ekonomisë shqiptare i janë shtuar kështu 89 milionë euro më shumë nga remitancat.
Kjo rritje lidhet edhe me ndryshimin e hartës së emigracionit. Italia dhe Greqia vijojnë të kenë komunitetet më të mëdha shqiptare por vitet e fundit emigrantët janë shpërndarë gjithnjë e më shumë drejt vendeve si Gjermania dhe Britania e Madhe, ku pagat më të larta krijojnë edhe më shumë mundësi për dërgesa drejt familjeve në Shqipëri.
Rritja e këtij viti vjen pas një tjetër rekordi të vendosur në vitin 2025. Gjatë gjithë vitit të kaluar, remitancat arritën në rreth 1.12 miliardë euro duke kaluar për herë të parë ndjeshëm nivelin e 1 miliard eurove.
Read more:Fundi i gushtit sjell fluks nga Kosova drejt Shqipërisë, trafik në Rrugën e Kombit
Megjithatë, forcimi i lekut ndaj euros vijon të zbehë një pjesë të efektit të këtyre dërgesave për familjet që i konvertojnë të ardhurat në monedhën vendase.
Gjatë gjysmës së parë të vitit 2026, euro ka vijuar tendencën rënëse ndaj lekut, duke kaluar nga një mesatare mujore prej rreth 96.6 lekësh në janar në rreth 94.8 lekë në qershor.
