Dënimi i katër ish-drejtuesve të UÇK-së nga Gjykata Speciale në Hagë është diskutuar edhe në Konferencën e Kryetarëve në Kuvendin e Shqipërisë. Katër ish-krerët e UÇK-së, Hashim Thaçi, Kadri Veseli, Rexhep Selimi dhe Jakup Krasniqi, u dënuan me një total prej 81 vitesh burgim nga Dhomat e Specializuara të Kosovës.
Kreu i grupit parlamentar të PD-së, Gazment Bardhi, kërkoi që Kuvendi i Shqipërisë të mbajë një qëndrim të përbashkët lidhur me vendimin e Hagës.
Bardhi tha se në Komisionin për Politikën e Jashtme është diskutuar më herët për një draft-deklaratë të përbashkët, duke propozuar që kjo çështje të diskutohet edhe në Konferencën e Kryetarëve.
Read more:Konjufca: Rrëzimi i aktakuzës së Speciales do të ishte fitore për Kosovën
“Për çështjet e brendshme kemi shumë ndasi, por nuk ka asnjë arsye të kemi ndasi për çështjen e Kosovës. Unë propozoj ta diskutojmë këtu këtë qëndrim dhe ju, zoti Kryetar i Kuvendit, në emër të Kuvendit, të mbani një qëndrim zyrtar dhe të përbashkët”, tha Bardhi.
Sipas tij, deri tani nuk ka pasur një qëndrim zyrtar nga qeveria apo Ministria për Evropën dhe Punët e Jashtme lidhur me vendimin e Gjykatës Speciale.
“Nuk ka pasur një qëndrim zyrtar të qeverisë, nuk ka pasur një qëndrim zyrtar të Ministrisë së Jashtme. Këtë nuk e di pse! Por kjo nuk na pengon që ne të kemi një qëndrim të përbashkët të të gjitha forcave politike për çështjen e Kosovës”, u shpreh ai.
Bardhi theksoi se çështja e Kosovës duhet të trajtohet jashtë ndasive të politikës së brendshme shqiptare, duke shtuar: “Kosova nuk ka nevojë që ne të bëjmë politikë”.
Ditën e djeshme pas shpalljes së vendimit, Bardhi e kishte cilësuar atë si “të pabesueshëm” dhe “të papranueshëm”, duke e përshkruar si një ditë të rëndë për kombin shqiptar.
