Kryeministri i Kosovës, Albin Kurti, ka kërkuar një dakordim për një strategji shtetërore lidhur me reagimin ndaj verdiktit të shkallës së parë të Dhomave të Specializuara në Hagë për katër ish-krerët e Ushtrisë Çlirimtare të Kosovës.
Kurti i bëri deklaratat pas një takimi me të rinj të diasporës shqiptare në Shtetet e Bashkuara, ku theksoi se Qeveria e Kosovës do të ofrojë mbështetje për përpjekjet në procesin e apelimit, por edhe për veprimet në planin diplomatik.
“Qeveria e Republikës së Kosovës është e përkushtuar që të ofrojë mbështetje, në çdo mënyrë dhe me të gjitha mjetet që i ka në dispozicion, me qëllim korrigjimin e verdiktit të Dhomave të Specializuara ndaj ish-krerëve të UÇK-së”, ka shkruar Kurti në Facebook.
Read more:Çështja e Presidentit në Kosovë, Kurti dhe kreu i LDK-së takohen sërish
Ai e cilësoi vendimin si të padrejtë juridikisht e moralisht, si dhe të pasaktë historikisht dhe faktikisht, duke theksuar nevojën për një qëndrim të koordinuar institucional.
“Një dakordim mbi një strategji shtetërore për reagim sa më të përshtatshëm dhe efikas ndaj verdiktit të shkallës së parë, si në ndihmën e ekipeve në instancat e apelit, ashtu edhe në rrafshin diplomatik, është i nevojshëm”, u shpreh Kurti.
Kryeministri tha gjithashtu se Kosova do të bashkëpunojë me aleatët ndërkombëtarë dhe do të vazhdojë angazhimin për mbrojtjen e luftës së UÇK-së, ndërsa kërkoi që të vazhdojë dokumentimi dhe zbardhja e krimeve dhe masakrave të kryera nga Serbia në Kosovë.
Read more:Pas vendimit të Hagës, komuniteti shqiptaro-amerikan paralajmëron protestë para OKB-së në New York
“Do të bashkëpunojmë me aleatët tanë ndërkombëtarë, do të angazhohemi pandërprerë në mbrojtjen e luftës sonë çlirimtare përballë propagandave të Serbisë dhe, njëkohësisht, në zbardhjen e masakrave dhe krimeve të tjera të Serbisë në Kosovë”, deklaroi Kurti.
Ndërkohë, gjatë takimit me të rinjtë e diasporës në New York, Kurti tha se janë diskutuar edhe çështje që lidhen me ekonominë dhe përmirësimin e sistemit gjyqësor.
Në mesjavë, Dhomat e Specializuara në Hagë dënuan me një total prej 81 vitesh burgim Hashim Thaçin, Jakup Krasniqin, Kadri Veselin dhe Rexhep Selimin. Të dënuarit kanë paralajmëruar ankimimin e vendimit në Apel.
Në Kosovë, ndërkohë, janë zhvilluar protesta kundër vendimit, ndërsa debati për hapat që duhet të ndërmerren në nivel institucional dhe diplomatik vijon.
