Deputetja e Partisë Demokratike, njëherazi kryetare e Komisionit për të Drejtat e Njeriut dhe Mjetet e Informimit Publik, Jorida Tabaku u shpreh sot se rezolutat e Parlamentit Europian duhet të kthehen në plane pune për Shqipërinë.
Në takimin e 22-të të Komitetit Parlamentar të Stabilizim-Asociimit BE–Shqipëri, Tabaku u shpreh se ka të paktën 17 ligje për të cilat opozita ka ngritur shqetësimin pranë Parlamentit Europian, Komisionit Europian dhe institucioneve europiane.
Ajo veçoi rastin e kompanisë KAYO, tenderat në teknologjinë e informacionit, zhvillimeve që i paraprijnë tenderave në shëndetësi, krijimin e Bankës së Zhvillimit apo Korporatës së Investimeve.
Read more:Tabaku: “Balluku” dhe ‘Kayo” s’janë të izoluar, parlamenti përdoret për të mbrojtur korrupsionin
“Nuk janë raste të pakta kur Parlamenti i Shqipërisë ka miratuar ligje të cilat kanë qenë jo vetëm në shkelje të marrëveshjes së Stabilizim-Asocimit, por njëkohësisht në shkelje edhe të disa prej kapitujve që ne jemi duke negociuar”, tha Tabaku.
Duke iu referuar rastit të kompanisë KAYO, Tabaku theksoi se ky është një rast konkret kur parlamentit i është ulur fuqia për të kontrolluar, ndërkohë që ka krijuar problematika edhe në sektorin e mbrojtjes.
Po ashtu, sipas saj, edhe çështja e ligjit për për investimet strategjike është ngritur në rezolutën e fundit të Parlamentit Europian.
“Kemi ligjin për zonat e mbrojtura, Paketën e Maleve dhe shumë ligje të tjera që Parlamenti Europian i ka përmendur në rezolutën e tij. Rezolutat e Parlamentit Europian duhet të kthehen në plane pune për Shqipërinë. Pozicionet negociuese të qeverisë shqiptare nuk janë deklarata politike, por duhet të jenë pjesë e punës së përditshme të komisioneve parlamentare”, shtoi ajo.
Tabaku u ndal edhe te hapësira që ka opozita lidhur me kontrollin parlamentar, ndërsa shtoi se reformat që janë të nevojshme duhet të bëhen gjithëpërfshirëse duke përfshirë të dyja palët politike.
Ajo solli në vëmendje rastin e fundit të refuzimit të kërkesës së opozitës për ngritjen e komisionit parlamentar hetimor lidhur me kompaninë KAYO.
“Ky nuk është rasti i parë ku hapësira e opozitës për komisione hetimore parlamentare refuzohet”, tha Tabaku.
Po ashtu ajo theksoi se edhe të dyja reformat që janë duke u ndërmarrë në parlamentin e Shqipërisë, reforma Zgjedhore dhe ajo Territoriale duket se janë të njëanshme. “Parlamenti i Shqipërisë sot ka miratuar një kalendar për një reformë të njëanshme territoriale nga ana e qeverisë, një reformë që pa konsultim në dëm të interesit publik”, shtoi Tabaku.
