Rrjeti SafeJournalists ka reaguar pas incidentit të ndodhur sot jashtë ambienteve të Gjykatës së Posaçme kundër Korrupsionit dhe Krimit të Organizuar, ku ish-drejtorja e SHISH, Vlora Hyseni, iu drejtua gazetares investigative të News24, Klodiana Lala.
SafeJournalists e ka cilësuar deklaratën e Hysenit si frikësuese dhe diskredituese ndaj gazetares, duke theksuar se situata është veçanërisht shqetësuese pasi Lala ishte duke ushtruar detyrën e saj profesionale, duke i drejtuar pyetje një ish-zyrtareje të lartë për një çështje me interes publik.
Në reagimin e tij, rrjeti ngre gjithashtu pikëpyetje mbi mënyrën se si mund të jenë siguruar informacione lidhur me lëvizjet apo kontaktet profesionale të gazetares dhe nëse në këtë proces mund të jenë përdorur struktura shtetërore të inteligjencës.
“Incidenti ngre gjithashtu shqetësime për keqpërdorimin e mundshëm të autoritetit ose informacionit të inteligjencës. Përdorimi i informacionit të siguruar përmes strukturave të inteligjencës për të frikësuar ose diskredituar një gazetare do të cenonte konfidencialitetin e burimeve dhe raportimin e pavarur”, thuhet në reagimin e SafeJournalists.
Rrjeti i ka bërë thirrje ish-drejtoreshës së SHISH, Vlora Hyseni, që të tërheqë akuzën ndaj Klodiana Lalës dhe të përmbahet nga deklarata të tjera që, sipas tij, mund të frikësojnë, diskreditojnë apo rrezikojnë gazetaren.
SafeJournalists thekson rëndësinë e garantimit të sigurisë së gazetarëve dhe të drejtës së tyre për të ushtruar profesionin në mënyrë të pavarur, veçanërisht kur raportojnë për çështje me interes publik.
Reagimi i plotë:
Rrjeti SafeJournalists shpreh shqetësim serioz për frikësimin publik dhe përpjekjen për të diskredituar gazetaren investigative të News24, Klodiana Lala, nga Vlora Hyseni, ish-Drejtoreshë e Shërbimit Informativ të Shtetit (SHISH), më 24 shtator 2026.
Incidenti ndodhi jashtë Gjykatës së Posaçme kundër Korrupsionit dhe Krimit të Organizuar (GJKKO), ku Hyseni u paraqit në lidhje me një hetim në zhvillim nga Struktura e Posaçme kundër Korrupsionit dhe Krimit të Organizuar (SPAK). Hyseni ndodhet në arrest shtëpie në kuadër të një procedimi që buron nga një hetim më i gjerë mbi një grup të dyshuar kriminal, i cili dyshohet për manipulimin e tenderëve publikë në Agjencinë Kombëtare të Shoqërisë së Informacionit (AKSHI). Në ditët para incidentit, Lala kishte raportuar mbi këtë çështje dhe mbi komunikimet e pretenduara të Hysenit me Ergys Agasin, biznesmen dhe një nga figurat qendrore të hetimit për AKSHI-n.
Ndërsa Lala e pyeste Hysenin për këto komunikime, Hyseni iu përgjigj: “Klodi, si kalon ti në takime me agjentët serbë në dhomat e hotelit Rogner?” Akuza u bë publikisht, në prani të gazetarëve të tjerë dhe kamerave.
SafeJournalists e konsideron incidentin veçanërisht serioz, pasi Lala po ushtronte detyrën e saj profesionale dhe po pyeste një ish-zyrtare të lartë shtetërore për një çështje me interes të qartë publik, kur vëmendja u zhvendos drejt vetë gazetares. Lidhja publike e një gazetareje investigative me shërbime të huaja të inteligjencës mund të dëmtojë besueshmërinë e saj dhe ta ekspozojë ndaj ngacmimeve, kërcënimeve dhe rreziqeve për sigurinë. Kjo është veçanërisht shqetësuese duke pasur parasysh fushatat e mëparshme denigruese dhe ngacmimet ndaj Lalës në lidhje me raportimin e saj mbi korrupsionin dhe krimin e organizuar.
Pozicioni i Hysenit e bën deklaratën edhe më serioze. Pretendimi i saj se ka dijeni se me kë është takuar Lala dhe ku janë zhvilluar këto takime ngre shqetësime për përdorimin e mundshëm të informacionit të privilegjuar të siguruar përmes strukturave shtetërore të inteligjencës. Kjo ka pasoja të drejtpërdrejta për privatësinë e gazetarëve, mundësinë e mbikëqyrjes dhe konfidencialitetin e kontakteve dhe burimeve të tyre profesionale.
Deklarata ngre gjithashtu pikëpyetje nëse informacione mbi lëvizjet apo kontaktet profesionale të Lalës janë aksesuar ose përdorur nga strukturat e inteligjencës. Shqetësime të tilla mund të dekurajojnë burimet që të komunikojnë me gazetarët dhe të pengojnë raportimin investigativ mbi çështje sensitive.
Incidenti ngre gjithashtu shqetësime për keqpërdorimin e mundshëm të autoritetit ose informacionit të inteligjencës. Përdorimi i informacionit të siguruar përmes strukturave të inteligjencës për të frikësuar ose diskredituar një gazetare do të cenonte konfidencialitetin e burimeve dhe raportimin e pavarur.
SafeJournalists i bën thirrje Vlora Hysenit të tërheqë menjëherë akuzën ndaj Klodiana Lalës dhe të përmbahet nga deklarata të mëtejshme që mund ta frikësojnë, diskreditojnë ose rrezikojnë gazetaren.
Rrjeti i bën thirrje SHISH-it dhe institucioneve kompetente të mbikëqyrjes dhe drejtësisë të verifikojnë nëse ndonjë informacion i mbajtur apo i siguruar përmes strukturave shtetërore të inteligjencës mbi Klodiana Lalën, lëvizjet, komunikimet apo kontaktet e saj profesionale është aksesuar, bërë publik apo përdorur në lidhje me këtë incident, duke garantuar njëkohësisht mbrojtjen e plotë të burimeve konfidenciale dhe komunikimeve profesionale të gazetares.
Autoritetet shqiptare duhet gjithashtu të vlerësojnë çdo rritje të rrezikut për sigurinë e Lalës pas kësaj akuze dhe të reagojnë menjëherë ndaj çdo kërcënimi, ngacmimi apo forme tjetër të shënjestrimit.
SafeJournalists thekson se gazetarët duhet të jenë në gjendje të hetojnë dhe të kërkojnë llogari nga zyrtarë aktualë dhe ish-zyrtarë të fuqishëm pa iu nënshtruar frikësimit, akuzave për mungesë besnikërie apo insinuatave se kontaktet e tyre profesionale konfidenciale po monitorohen. Sjellje të tilla rrezikojnë të krijojnë një efekt frikësues jo vetëm për gazetaren e shënjestruar, por edhe për komunitetin më të gjerë të medias dhe për burimet e gatshme të japin informacion në interes të publikut.
Rrjeti SafeJournalists do të vazhdojë ta ndjekë rastin dhe do të informojë aktorët përkatës kombëtarë dhe ndërkombëtarë për zhvillimet e mëtejshme.
Prishtinë – Shkup – Sarajevë – Zagreb – Beograd – Podgoricë – Tiranë, 24 shtator 2026
Asociacioni i Gazetarëve të Shqipërisë
Asociacioni i Gazetarëve të Kosovës
Shoqata e Gazetarëve të Maqedonisë
Shoqata e Gazetarëve BH
Shoqata Kroate e Gazetarëve
