Partia Demokratike ka ngritur pikëpyetje lidhur me një pagesë prej 8.6 milionë lekësh ndaj kompanisë “TIMAK Defence”, duke pretenduar se dokumentet e procedurës janë hartuar pas lëshimit të faturës.
Në një deklaratë, zëdhënësja e Antikorrupsionit në PD, Genta Vangjeli, publikoi një kronologji dokumentesh që, sipas saj, tregon se fatura është lëshuar përpara urdhrit për zhvillimin e procedurës dhe përpara lidhjes së kontratës.
Sipas dokumenteve të publikuara nga PD, më 8 korrik 2026 “TIMAK Defence” ka lëshuar faturën nr. 83/2026. Më 22 korrik është nxjerrë urdhri nr. 3419/6 për zhvillimin e procedurës, ndërsa më 6 gusht është lidhur kontrata nr. 3419/8.
Më 18 gusht 2026, sipas deklaratës, Thesari i ka paguar kompanisë 8.641.296 lekë si parapagim për blerjen e automjeteve për IKMT.
PD pretendon se kjo kronologji ngre pikëpyetje mbi mënyrën e ndjekjes së procedurës, pasi fatura është lëshuar 14 ditë përpara urdhrit për zhvillimin e saj dhe 29 ditë përpara lidhjes së kontratës.
“Si mund të faturohet një kontratë përpara se të urdhërohet procedura dhe përpara se të ekzistojë kontrata?”, shprehet Vangjeli, duke kërkuar shpjegime nga Ministria e Brendshme.
Partia Demokratike ngre gjithashtu pyetje mbi përdorimin e VKM-së nr. 638, datë 5 nëntor 2025, si referencë për pagesën dhe kërkon sqarime mbi marrëdhëniet e kompanisë “TIMAK Defence” me KAYO-n.
Sipas PD-së, në një procedurë normale rendi i dokumenteve duhet të jetë procedura, kontrata, fatura dhe më pas pagesa. Në rastin e denoncuar prej saj, pretendohet se dokumentet ndjekin një rend tjetër: fatura, procedura, kontrata dhe pagesa.
Deklarata e zëdhënëses së Antikorrupsionit në PD, Genta Vangjeli
‘TIMAK DEFENCE’: Kur fatura vjen para procedurës dhe kontrata vjen më pas.
Një tjetër rast që kërkon përgjigje.
Përfituesi është ‘TIMAK Defence’, partneri i KAYO-s. Për pagesën përdoret si referencë edhe VKM nr. 638, datë 05.11.2025.
Kronologjia e dokumenteve është e qartë:
8 korrik 2026-’TIMAK Defence’ lëshon faturën nr. 83/2026.
22 korrik 2026-del urdhri nr. 3419/6 për zhvillimin e procedurës.
6 gusht 2026-lidhet kontrata nr. 3419/8.
18 gusht 2026-Thesari i paguan ‘TIMAK Defence’ 8.641.296 lekë, si parapagim për blerje automjetesh për IKMT.
Pra, fatura është lëshuar 14 ditë përpara urdhrit të procedurës dhe 29 ditë përpara kontratës!
Pyetje?
Si mund të faturohet një kontratë përpara se të urdhërohet procedura dhe përpara se të ekzistojë kontrata?
A po përdoret VKM-ja si mburojë ligjore për t’i çuar fondet publike një kompanie të lidhur me KAYO-n?
Sepse rendi normal është:
procedura→kontrata→fatura→pagesa.
Këtu dokumentet tregojnë:
fatura→procedura→kontrata→pagesa.
Kush e kishte sigurinë se kontrata do të lidhej, kur fatura ishte lëshuar ende pa dalë urdhri për procedurën?
Kjo është ajo që Ministria e Brendshme duhet t’u shpjegojë shqiptarëve.
Faturat nuk mund të paraprijnë procedurat.
Kontratat nuk mund të justifikojnë retroaktivisht faturat.
Paratë publike nuk mund të shpërndahen pa transparencë.
Dokumentet janë aty. Tani presim përgjigjet.
