Nga një profil i rremë i hapur në rrjetet sociale me emrin e Taulant Ballës, dy persona, tashmë të arrestuar, kontaktuan kreun e Federatës Shqiptare të Futbollit, Amand Duka.
Duke u hequr si politikani i rëndësishëm, me të cilin Duka ka njohje, Edison Korra dhe Orest Balla i kërkuan nëse mund t’i ndihmonte me 100 mijë euro, jo në cash, por në kriptovaluta.
Kreu i FSHF-së, siç burime nga policia thonë për Report Tv, e ka kuptuar se e gjitha ishte një mashtrim dhe se pas llogarisë nuk qëndronte Taulant Balla.
Duka i kallëzoi në polici dhe ku në bashkëpunim me agjentë të infiltruar i mbajti lojën personave që po mashtronin.
Presidenti i FSHF-së u ka shkruar fillimisht se nuk merrej me transaksione të tilla dhe i ka orientuar që të lidheshin me djalin e tij, duke i futur në karrem, se ishte ai që merrej me këto çështje.
Me dy të dyshuarit më tej e ka vijuar bisedën një agjent i infiltruar i policisë, i cili është prezantuar si djali i Armand Dukës. Agjenti u ka bërë të ditur mashtruesve se paratë nuk mund t’i dërgonte në kriptovaluta, por do t’ua dorëzonte në cash.
Të dyshuarit, Edison Korra 24 vjeç dhe Orest Balla, 23 vjeç, ranë në kurth. Pranuan dhe caktuan vetë se vendi i dorëzimit të parave do të ishte në Elbasan.
Armand Duka që ata prisnin t’u jepte paratë, ishte i mbikëqyrur nga policia. Sapo do merrnin 100 mijë eurot cash që ata prisnin, përballja ishte direkte me prangat e Forcave Operacionale.
Njëri prej tyre tentoi të largohej me vrap, por u ndoq dhe u kap nga efektivët e policisë.
Hetimet vijojnë, por policia dyshon se pas dyshes së arrestuar, qëndron, Florian Gjergji, në kërkim ndërkombëtar për mashtrimin e disa biznesmenëve në skema të ngjashme si me Armand Dukën së fundi duke përdorur identitetin e personazheve të njohur të politikës, për t’i kërkuar para palëve të treta.
Ky personash që vijon të jetë në një arrati të gjatë, prej 3 vitesh, kohë në të cilën dyshohet se nuk e ka ndaluar profesionin e mashtrimit. Ai dyshohet të jetë në Gjermani, por asnjë gjurmë e tij ende nuk është gjetur.
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
Dy të rinj tentuan të mashtrojnë Dukën duke u prezantuar si Balla, deputeti i PS: Rrjetet sociale të kontrollojnë llogaritë false
Kreu i grupit parlamentar të Partisë Socialiste taulant Balla reagoi menjëherë pas arrestimit të dy të rinjve të cilët tentuan të mashtrojnë në emër të tij, kreun e FSHF-së Armand Duka, duke i kërkuar 100 mijë euro.
Teksa publikon pamjet e arrestimit në flagrancë të dy mashtruesve, Balla përgëzon policinë e Shtetit, dhe nxit që qytetarët të bëjnë kujdes e të denoncojnë menjëherë çdo rast
Ai thekson se rrjetet sociale duket të forcojnë kontrollin ndaj llogarive false, referuar faktit që dy të arrestuarit kishin hapur një profil me emrin e Taulant Ballës, përmes të cilët kontaktuan Dukën.
“E përgëzoj Policinë e Shtetit Tiranë, të cilët me shumë efikasitet kanë goditur një rast tjetër kriminal mashtrimi në rrjetet e komunikimit on-line. Qytetarët duhet të bëjnë shumë kujdes dhe duhet ta denoncojnë menjëherë çdo rast! Ndërsa rrjetet sociale duhet të forcojnë kontrollin ndaj llogarive fallco”, shkroi Balla.
