Tre persona janë arrestuar në Tropojë e Kukës për kultivim kanabisi, armëmbajtje dhe vjedhje.
Një 38-vjeçar i cili u gjet 50 metra larg një parcele në Tropojë të Vjetër ku ishin mbjellë 42 bimë kanabisi, është vënë nën pranga. Kur i është kryer kontrolli fizik, efektivët i kanë gjetur edhe pistoletë me krehër dhe 9 fishekë, ndërsa në shtëpi mbante armë gjahu, municione si dhe një thikë.
Një 45-vjeçar, banues në Markaj, u arrestua pasi në shtëpinë e tij u gjet një automatik dhe fishekë, tashmë të sekuestruar.
Policia e Kukësit ka zbardhur edhe vjedhjen e një automjeti dhe një lokali, pas të cilave qëndron një 31-vjeçar. Automjeti i vjedhur më 26 shtator është sekuestruar, bashkë me celularin që kishte marrë në lokal, si dhe një thikë.
Njoftimi i policisë:
Finalizohen tre operacione gjatë 24 orëve të fundit.
Goditen dy raste të armëmbajtjes pa leje dhe kultivimit të bimëve narkotike në Tropojë.
Zbardhen dy raste të vjedhjes me thyerje në Kukës.
Vihen në pranga tre shtetas. Sekuestrohen 2 armë zjarri dhe një armë gjahu, municion luftarak dhe bimë narkotike
Read more:Tritoli me celularin pranë makinave të parkuara në Durrës, policia arreston dy të dyshuarit (VIDEO)
Në vijim të punës për parandalimin, evidentimin dhe goditjen e rasteve të armëmbajtjes pa leje, zbardhjen e vjedhjeve dhe vënien përpara përgjegjësisë ligjore të autorëve, si dhe për parandalimin dhe goditjen e kultivimit të bimëve narkotike, shërbimet e Komisariatit të Policisë Tropojë, në bashkëpunim me strukturat e Drejtorisë Vendore të Policisë Kukës, në kuadër të operacionit “Befasia”, vunë në pranga shtetasin E. M., 45 vjeç, banues në Markaj, Tropojë.
Në zbatim të vendimit të Gjykatës, gjatë kontrollit në banesë, shërbimet e Policisë kanë gjetur dhe sekuestruar, në cilësinë e provës materiale, një armë zjarri automatike dhe municion luftarak.
Po në Tropojë, në kuadër të operacionit policor të koduar “Ëeekend”, u arrestua në flagrancë shtetasi S. H., 38 vjeç, për veprat penale “Kultivimi i bimëve narkotike”, “Prodhimi, mbajtja pa leje e armëve dhe municionit” dhe “Prodhimi, mbajtja pa leje e armëve të ftohta”.
Bazuar në informacionet e siguruara në rrugë operative, shërbimet e Policisë ushtruan kontroll në një zonë të pyllëzuar, në territorin e Njësisë Administrative Tropojë e Vjetër, ku dyshohej se kultivoheshin bimë narkotike.
Shërbimet e Policisë, në momentin e ndërhyrjes, konstatuan shtetasin S. H., 38 vjeç, rreth 50 metra larg një parcele ku ishin kultivuar 42 bimë narkotike kanabis. Nga veprimet hetimore rezultoi se këto bimë dyshohet se ishin kultivuar nga ky shtetas.
Gjatë kontrollit fizik, shtetasit S. H. iu gjet dhe iu sekuestrua një armë zjarri pistoletë me krehër dhe 9 fishekë, ndërsa në banesë iu gjet një armë gjahu, municion, si dhe një armë e ftohtë (thikë).
Ndërkohë, shërbimet e Komisariatit të Policisë Kukës, si rezultat i veprimeve të shpejta hetimore, bënë të mundur zbardhjen dhe dokumentimin me prova ligjore të dy rasteve të vjedhjes me thyerje, të një automjeti dhe të një lokali. Në kuadër të operacionit “Hija”, në bashkëpunim me shërbimet e Drejtorisë Vendore të Policisë Durrës, u kap shtetasi I. J., 31 vjeç, banues në Krumë, Has.
Ky shtetas, në orët e para të mëngjesit të datës 26.09.2026, ka vjedhur me thyerje një automjet në pronësi të shtetasit R. B., si dhe ka thyer dhe vjedhur në një lokal në pronësi të shtetasit G. M. Në cilësinë e provës materiale u sekuestruan automjeti i vjedhur, një aparat celular që e kishte vjedhur në lokal, dhe një armë e ftohtë (thikë).
Specialistët për Hetimin e Krimeve në Komisariatin e Policisë Kukës, në bashkëpunim me Komisariatin e Policisë Has dhe Komisariatin e Policisë Durrës, po vijojnë punën për zbardhjen dhe dokumentimin edhe të disa vjedhjeve të tjera, të dyshuara të kryera nga ky shtetas në Has dhe Durrës.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Kukës, për veprime të mëtejshme.
——————————-
Sqarim: Çdo person prezumohet i pafajshëm deri sa nuk vërtetohet fajësia e tij me vendim gjyqësor të formës së prerë
