Autoriteti Kombëtar për Sigurinë Kibernetike ka informuar se PHP, një gjuhë programimi që përdoret kryesisht për krijimin e faqeve të internetit dhe aplikacioneve web, është cenuar. Sipas njoftimit, nevojitet përditësim i menjëhershëm i versioneve në përdorim, ndërsa cilëson edhe ato që janë prekur.
Shfrytëzimi i këtyre cenueshmërive mund të krijojë mundësi për ekzekutimin e paautorizuar të kodit në distancë, duke vënë në rrezik sigurinë e sistemeve informatike, integritetin e të dhënave dhe vazhdimësinë e shërbimeve dixhitale.
Njoftimi i plotë:
Autoriteti Kombëtar për Sigurinë Kibernetike (AKSK) informon institucionet, bizneset, organizatat dhe administratorët e sistemeve mbi dy cenueshmëri kritike në PHP, një teknologji e përdorur për funksionimin e faqeve dhe aplikacioneve Web. Shfrytëzimi i tyre mund të mundësojë ekzekutimin e paautorizuar të kodit në distancë, duke rrezikuar sigurinë e sistemeve dhe të dhënave.
Cenueshmëritë, të identifikuara si CVE-2026-109618 dhe CVE-2026-109619, lidhen me mënyrën se si PHP menaxhon memorien dhe gjendjen e brendshme gjatë përpunimit të kërkesave. Të dyja klasifikohen si kritike, me vlerësim 9.2 nga 10 sipas CVSS v4.0.
Për adresimin e tyre janë publikuar përditësime të sigurisë. Administratorët duhet të verifikojnë versionet në përdorim dhe të instalojnë versionet e korrigjuara përkatëse:
Masat që duhet të ndërmerren
AKSK rekomandon verifikimin e menjëhershëm të versioneve të PHP-së në sistemet dhe aplikacionet në përdorim, si dhe instalimin e përditësimeve nga burimet zyrtare ose ofruesit përkatës. Krahas përditësimit, administratorët duhet të krijojnë kopje rezervë dhe të monitorojnë sistemet për aktivitete të dyshimta.
Përditësimi në një version të korrigjuar mbetet masa kryesore për adresimin e plotë të këtyre cenueshmërive. Masat e përkohshme për kufizimin e ekspozimit nuk e zëvendësojnë atë.
AKSK u bën thirrje të gjitha subjekteve që përdorin PHP të trajtojnë me përparësi zbatimin e këtyre masave, për të reduktuar rrezikun e komprometimit të sistemeve dhe për të mbrojtur të dhënat dhe shërbimet e tyre digjitale.
