Shtetet e Bashkuara pritet të nxjerrin këtë verë një seri të kufizuar pasaportash të reja, të dizajnuara për të përkujtuar 250-vjetorin e pavarësisë.
Ajo që bie më shumë në sy është përfshirja e imazhit të Presidentit Donald Trump në brendësi të dokumentit.
Si do të jenë pasaportat e reja?
Sipas një zyrtari të Departamentit të Shtetit, pasaportat do të shpërndahen fillimisht nga Agjencia e Pasaportave në Uashington për aplikimet fizike. Opsionet online dhe vendndodhjet e tjera do të vazhdojnë të përdorin modelin aktual.
Në kopertinën e brendshme shfaqet fytyra dhe firma e Trump me ngjyrë ari. Ndërsa në pjesën e pasme do të jetë piktura “Deklarata e Pavarësisë” e John Trumbull.
Zëdhënësi i Departamentit të Shtetit, Tommy Pigott, konfirmoi se pasaportat janë pjesë e aktiviteteve për 250-vjetorin e SHBA-së në korrik. Ai theksoi se dizajni i ri do të përfshijë elemente artistike të personalizuara, duke ruajtur standardet e larta të sigurisë. Sakaq ende nuk dihet numri i saktë i pasaportave që do të lëshohen.
Aktualisht, pasaportat amerikane përmbajnë një ilustrim të Francis Scott Key dhe vargje nga himni kombëtar. Modeli i ri shënon një ndryshim të rëndësishëm në përmbajtje dhe simbolikë.
Përdorimi i imazhit të Trump në materiale përkujtimore nuk është i ri. Ai është shfaqur edhe në:
-Leje për parqet kombëtare së bashku me George Washington
-Monedha përkujtimore për 250-vjetorin
-Institucione si Qendra Kennedy dhe Instituti Amerikan i Paqes
Pasaportat, megjithatë, përbëjnë rastin më të rëndësishëm, pasi janë dokumente zyrtare identifikimi me vlefshmëri deri në 10 vite dhe përdorim ndërkombëtar.
