Presidentja Siljanovska-Davkova, në kuadër të pjesëmarrjes së saj në Samitin e 8-të të Komunitetit Politik Evropian, i cili po mbahet në Jerevan të Armenisë, sot mbajti një fjalim në tryezën e rrumbullakët me temën “Forcimi i Lidhshmërisë dhe Sigurisë Ekonomike në Kontekstin e Tranzicionit të Gjelbër”.
Ajo vlerësoi se konfliktet aktuale globale dhe turbulencat energjetike krijojnë rreziqe serioze për stabilitetin energjetik, ku shtetet e vogla janë veçanërisht të cenueshme.
Për Siljanovska-Davkovan, lidhja energjetike nuk është vetëm një çështje ekonomike, por edhe një përparësi sigurie kombëtare, rajonale dhe evropiane.
Read more:Video/ Samiti në Armeni, Emmanuel Macron vrapon në rrugët e Jerevan
Ajo beson se pengesat më të mëdha për lidhjen energjetike në Ballkanin Perëndimor nuk janë të natyrës teknike, por politike.
Sipas saj, mosmarrëveshjet dypalëshe dhe (keq)përdorimi i vetos shkaktojnë më shumë dëme në lidhshmërinë rajonale sesa çdo mungesë infrastrukture.
“Çdo proces integrimi i ngrirë do të thotë investime dhe e ardhme e ngrirë”, tha Presidentja.
Siljanovska-Davkova arriti në përfundimin se vendet e rajonit individualisht kanë kapacitete të kufizuara, por përmes veprimit të përbashkët ato mund të bëhen një partner i vlefshëm evropian. Infrastruktura e përbashkët krijon interesa të ndërsjella dhe ndërvarësi të vendeve, gjë që nga ana tjetër ndikon në uljen e rrezikut të konflikteve dhe në qëndrueshmërinë më të madhe të palëve të treta./Telegrafi/
