Ministri i Jashtëm i Iranit, Abbas Araghchi, paralajmëroi SHBA-në që të mos “tërhiqet sërish drejt kënetës”, pas një dite sulmesh në Ngushticën e Hormuzit.
“Ndërsa bisedimet po përparojnë falë përpjekjeve dashamirëse të Pakistanit, SHBA duhet të jetë e kujdesshme që të mos tërhiqet sërish në kënetë nga dashakeqësit. Po ashtu edhe Emiratet e Bashkuara Arabe,” thotë ai duke shtuar: “Projekti Liria është Projekti Dryni.”
“Projekti Liria” i Donald Trump, i nisur të hënën, synon të përdorë ushtrinë amerikane për të shoqëruar anijet tregtare të bllokuara jashtë këtij korridori të rëndësishëm detar. Irani këmbëngul se e kontrollon Ngushticën dhe dje, sipas SHBA-ve, lëshoi raketa dhe dronë kundër anijeve ushtarake dhe tregtare.
Trump tha se SHBA “rrëzoi” shtatë “anije të shpejta” iraniane, një pretendim i mohuar nga Teherani.
Koreja e Jugut dhe Emiratet e Bashkuara Arabe raportuan dëme në anije tregtare, ndërsa një sulm i dyshuar iranian shkaktoi një zjarr në një depo nafte në Emirate. Rreth 2,000 anije mendohet të jenë të bllokuara në Ngushticën e Hormuzit. SHBA thotë se dy anije me flamur amerikan arritën të largoheshin dje.
Kompania e transportit detar Maersk tha se një nga anijet e saj arriti të largohej, e shoqëruar nga ushtria amerikane.
Lajm në përditësim…
BE: Teherani duhet të ndalojë sulmet ndaj Emirateve dhe Omanit dhe të respektojë sovranitetin e vendeve të Gjirit
Foto: Flamuri i BE-së
BE-ja “dënon fuqimisht sulmet e paprovokuara me raketa dhe dronë të Iranit kundër partnerëve tanë strategjikë në Gjirin Persik”, duke shprehur solidaritetin e saj me Emiratet e Bashkuara Arabe dhe Omanin, të prekur nga agresioni iranian.
Kështu deklaroi zëdhënësi për Punët e Jashtme dhe Politikën e Sigurisë në Komisionin Evropian, Anouar El Anouni, teksa i bëri thirrje Teheranit që “t’i ndërpresë menjëherë këto sulme, në shkelje flagrante të së drejtës ndërkombëtare, dhe të respektojë sovranitetin dhe integritetin territorial të vendeve në rajon”.
“Siguria në Evropë dhe Gjirin Persik është e ndërlidhur. BE-ja do të vazhdojë të punojë me partnerët tanë rajonalë për të kontribuar në deeskalimin dhe stabilitetin rajonal. Ne jemi të gatshëm të kontribuojmë në të gjitha përpjekjet diplomatike për të ulur tensionet dhe për të gjetur një zgjidhje të qëndrueshme që i jep fund armiqësive, parandalon Iranin të pajiset me armë bërthamore dhe i jep fund aktiviteteve të tij destabilizuese”, tha ai.
Kryeparlamentari iranian: SHBA-të po shkelin armëpushimin
Kryetari i parlamentit të Iranit dhe negociatori kryesor në bisedimet e muajit të kaluar me SHBA-të, tha se këto të fundit kanë rrezikuar sigurinë e transportit detar dhe energjisë në Ngushticën e Hormuzit.
Në një postim në X këtë mëngjes, pas nisjes së “Operacionit Liria” nga Donald Trump të hënën, Mohammad Ghalibaf akuzon SHBA-të për “shkelje të armëpushimit” dhe “vendosje të një bllokade” në Ngushticë.
Ai e përfundon postimin duke paralajmëruar se “status quo”-ja është “e papranueshme” për SHBA-të, ndërsa thotë se Irani “madje nuk ka filluar ende”.
Kërcënimi i ri i Trump për Iranin: Do të fshihet nga faqja e dheut nëse sulmon anijet amerikane
Presidenti i SHBA-ve Donald Trump tha në një intervistë për Fox News se Irani do të “fshihej nga faqja e dheut” nëse vendi sulmon anijet amerikane gjatë “Operacionit Liria”.
Ai shtoi gjithashtu se Irani është bërë “shumë më i përkulshëm” në negociatat e paqes, duke theksuar se SHBA ka burime ushtarake më të mëdha se Irani.
Deklaratat e Trump vijnë pasi ai tha në Truth Social se forcat amerikane kishin goditur shtatë “anije të vogla” iraniane si pjesë e operacionit për të hapur Ngushticën e Hormuzit. SHBA gjithashtu deklaroi se ka rrëzuar dronë dhe raketa iraniane.
