Arsenali ka siguruar finalen e Ligës së Kampionëve pas fitores në ndeshjen e kthimit ndaj Atletico Madridit në “Emirates”. Pas barazimit 1-1 në takimin e parë në “Metropolitano”, londinezët fituan sonte ndeshjen e dytë 1-0 dhe e mbyllën gjysmëfinalen me rezultat të përgjithshëm në favorin e tyre.
Ndeshja nisi me dy ekipet që kërkonin hapësira, por ishin shumë të kujdesshme në fazën mbrojtëse.
Ndeshja u vendos në fund të pjesës së parë, kur Bukayo Saka realizoi në minutën e 44-t, duke shfrytëzuar rikthimin e topit pas pritjes së Oblak ndaj goditjes së Trossard.
Goli i Sakas i dha qetësi Arsenalit dhe e detyroi Atleticon të kërkonte më shumë rrezik në pjesën e dytë.
Atletico e nisi fraksionin e dytë duke tentuar të rrisë presionin dhe kërkoi edhe penallti në minutën e 51-të, kur Giuliano Simeone ra në zonë, por gjyqtari Daniel Siebert i hodhi poshtë menjëherë protestat.
Arsenali pati edhe një rast të mirë në minutën e 66’, kur Viktor Gyökeres goditi pas një topi të ngritur, por tentativa e tij kaloi ngushtë mbi traversë.
Në anën tjetër, Simeone vazhdoi me zëvendësime në minutën e 66’, duke i nxjerrë nga loja Julián Alvarez dhe Antoine Griezmann, të zëvendësuar nga Thiago Almada dhe Alex Baena, në përpjekje për të gjetur energji dhe ide të reja në sulm.
Read more:Barcelona merr sinjale pozitive për transferimin e Julian Alvarezit
Megjithatë, Arsenali menaxhoi mirë avantazhin, mbajti ritmin e lojës dhe nuk lejoi që Atletico të krijonte raste të pastra në minutat vendimtare.
Me këtë fitore në “Emirates”, Arsenali vulos kualifikimin dhe kalon në finalen e Ligës së Kampionëve, duke kurorëzuar një rrugëtim të madh evropian pas dy ndeshjeve të forta ndaj ekipit të Simeones. /Telegrafi/
