Një hetim i ri mbi sulmet e 7 tetorit 2023 në Izrael ka arritur në përfundimin se dhuna seksuale dhe ajo me bazë gjinore e kryer nga Hamasi dhe organizata të tjera palestineze ishte “sistematike, e përhapur dhe e paramenduar”, duke e cilësuar atë si pjesë qendrore të sulmit ndaj civilëve izraelitë.
Raporti prej 300 faqesh, i përgatitur nga Komiteti Politik i Hamasit mbi Krimet kundër Grave dhe Fëmijëve të 7 tetorit 2023, dokumenton përdhunime, tortura, gjymtime seksuale dhe abuzime të tjera të rënda të kryera gjatë masakrës dhe marrjes së pengjeve. Sipas studimit, dhuna seksuale nuk u përdor vetëm kundër viktimave individuale, por si “mjet terrori” për të frikësuar dhe poshtëruar të gjithë shoqërinë izraelite.
“Ajo që pamë ishte një urrejtje e thellë që synonte të na terrorizonte si popull”, deklaroi ekspertja e së drejtës ndërkombëtare Dr. Kochav Elkayam-Levi, e cila drejtoi hetimin.
Raporti bazohet në më shumë se 430 intervista dhe dëshmi nga të mbijetuar, pengje të liruara, dëshmitarë okularë dhe familjarë të viktimave, si dhe në analizën e mbi 10 mijë videove dhe fotografive të mbledhura nga hetuesit.
Hetimi dokumenton 13 forma të ndryshme të dhunës seksuale, përfshirë përdhunimin në grup, abuzimin seksual pas vdekjes, gjymtimet dhe poshtërimet publike. Në shumë raste, viktimat u gjetën të zhveshura ose me shenja torture në organet gjenitale.
Read more:Nuk i mbijetoi plagëve, sulmi ajror izraelit vret djalin e kryenegociatorit të Hamasit me SHBA
Një dëshmitare e festivalit muzikor Nova rrëfeu para komisionit se kishte parë një grua të përdhunohej nga disa persona njëri pas tjetrit përpara se të ekzekutohej. Raporti përfshin edhe dëshmi të burrave që pretendojnë se janë abuzuar seksualisht gjatë sulmit.
Sipas hetuesve, Hamasi dhe grupet e tjera jo vetëm që kryen mizoritë, por edhe i filmuan dhe i shpërndanë ato në rrjetet sociale për të shkaktuar terror psikologjik. Në disa raste, familjarët e viktimave mësuan për fatin e të afërmve të tyre përmes videove të publikuara online.
Raporti argumenton se këto veprime përbëjnë krime lufte, krime kundër njerëzimit dhe akte gjenocidi sipas ligjit ndërkombëtar. Autorët e studimit kërkojnë që Izraeli dhe organizmat ndërkombëtarë të ndjekin penalisht përgjegjësit për dhunën seksuale të kryer gjatë sulmeve.
Studimi ka marrë mbështetjen e disa figurave të njohura ndërkombëtare, përfshirë Hillary Clinton dhe ekspertë të tjerë të së drejtës ndërkombëtare.
Më 7 tetor 2023, mijëra militantë të Hamasit dhe grupeve të tjera palestineze hynë në Izrael nga Gaza, duke vrarë rreth 1,200 persona dhe duke marrë peng 251 të tjerë. Pas sulmit, autoritetet izraelite arrestuan qindra persona të dyshuar si pjesëmarrës në masakër.
