Një objekt banimi prej 12 katesh në Tiranë është konfiskuar pasi 3 katet e fundit ishin ngritur jashtë lejes së ndërtimit. Objekti që funksiononte dhe për banim si dhe për shërbime, ndodhet në rrugën ‘Llukë Kaçaj’ ndërsa tashmë do të përdoret për interes publik. Nga aksioni i zhvilluar nga komisariati nr.4 dhe Inspektoriati i Mbrojtjes së Territorit (IMT) u konstatua se objekti ishte vënë në shfrytëzim pa certifikatë përdorimi.
Bëhet fjalë për një pallat që nuk ka përfunduar akoma plotësisht, dhe deri tani askush nuk banon në të. Ndërtimi është nisur fillimisht nga Mirsim Jellla, i cili sipas burimeve nuk ka mundur ta përfundojë për çështje financash, dhe ka vijuar nga Adriatik Shtëmbari.
Njoftimi i Policisë së Shtetit
Konfiskohet për interes publik, objekt banimi dhe shërbimi në rrugën “Llukë Kaçaj”, ndërtuar dhe përdorur në kundërshtim me ligjin.
Si rezultat i një aksioni të përbashkët ndërmjet strukturave të Policisë së Shtetit dhe atyre të Inspektoratit të Mbrojtjes së Territorit, Bashkia Tiranë, nëpërmjet Drejtorisë së Monitorimit dhe Zbatueshmërisë së Lejeve të Ndërtimit, ndërmarrë në zbatim të ligjit dhe në mbrojtje të interesit publik, është konfiskuar për interes publik, objekt banimi dhe shërbimi, në rrugën “Llukë Kaçaj”, Njësia Administrative Nr. 4, Tiranë.
Nga verifikimet e kryera rezultoi se ishte ndërtuar në tejkalim të lejes së ndërtimit, kati i 10 dhe i 11 i objektit 9-katësh dhe një pjesë e katit të 12 të tij.
Gjithashtu, u konstatua se objekti ishte vënë në shfrytëzim, pa certifikatë përdorimi.
Referuar Aktit Normativ Nr. 8, datë 01.10.2025, tejkalimi rezultoi mbi pragun ligjor 10% të parashikuar për masën e konfiskimit për interes publik.
Materialet procedurale iu referuan Prokurorisë, për veprime të mëtejshme.
Gjithashtu, specialistët e Sektorit për Hetimin e Krimeve Ekonomiko-Financiare në Departamentin e Policisë Kriminale dhe shërbimet e Komisariatit të Policisë Nr. 4 Tiranë, kanë referuar disa herë materiale procedurale në Prokurori, për shkelje të konstatuara në këtë objekt.
Policia e Shtetit mbetet maksimalisht e angazhuar për të bashkëpunuar ngushtë me të gjitha agjencitë ligjzbatuese të ngarkuara për kontrollin e territorit, me qëllim parandalimin, konstatimin dhe goditjen e rasteve të ndërtimeve të paligjshme dhe krimeve kundër mjedisit në tërësi.
Lajmi në përditësim…
