Një ngjarje shqetësuese është raportuar në shkollën e mesme “Galileo Galilei”, ku një profesor është kërcënuar nga një nxënës me një armë që i ngjante pushkës së vërtetë, gjatë orës së mësimit.
Sipas mediave italiane, nxënësi i ka kërkuar mësuesit cigare duke e kërcënuar me fjalët: “Më jep cigaret ose do të qëlloj”. Ngjarja ka ndodhur më 21 maj në një klasë të një kursi paraprofesional, ku mësuesi është kapur në befasi nga një grup nxënësish, ndërsa njëri prej tyre dyshohet se i ka drejtuar armën në drejtim të kokës.
Read more:Të shtëna me armë në Teksas/ Një i vdekur dhe 11 të plagosur, autori ende në arrati
Arma e përdorur rezulton të ketë qenë një kopje e saktë e një pushke të vërtetë, e cila megjithatë ka shkaktuar panik të madh në klasë. Incidenti është filmuar dhe më pas është raportuar nga vetë profesori, i cili ka informuar menjëherë drejtuesit e shkollës dhe ka bërë shënimin përkatës në regjistrin e klasës.
Drejtoria e shkollës ka konfirmuar se rasti po trajtohet sipas procedurave disiplinore, por nuk ka dhënë detaje për masat e marra ndaj nxënësit të përfshirë.
Sipas raportimeve, shkolla kishte qenë edhe më parë në qendër të vëmendjes për një tjetër incident, ku gjatë pushimit ishte organizuar një “ndeshje boksi” mes nxënësve, çka kishte sjellë më herët masa disiplinore dhe përjashtime nga provimet për disa prej tyre.
