Kryeministri Edi Rama ka kritikuar disa kryetarë bashkish, duke i paralajmëruar që të mos qëndrojnë në Tiranë gjatë javës dhe të lënë pas dore detyrat në komunitetet që drejtojnë.
Në një deklaratë të bërë gjatë një takimi me grupin, Rama u shpreh se kjo praktikë duhet të marrë fund dhe nuk duhet të përsëritet më, duke theksuar se disa prej tyre po krijojnë probleme në funksionimin e bashkive.
“Po e mbyll me një vërejtje për disa nga kryetarët e bashkive, nuk dua t’i përmend me emra. Janë bërë pak problem për komunitetin, pasi nuk qëndrojnë në komunitet gjatë gjithë javës, por vijnë në Tiranë edhe në ditët kur duhet të jenë në krye të detyrës atje. Kjo praktike duhet të marrë fund. Nuk janë të gjithë, por janë disa. Ndërkohë shembulli i ministrit aktual të pushtetit vendor, që vjen nga një eksperiencë shërbimi jashtë Tiranës, edhe pse shtëpinë e ka në Tiranë është një shembull që duhet ta kenë parasysh disa kryetarë që sot nuk dua ti përmend me emra, por herën tjetër do të duhet ti përmend me emër dhe publikisht. Që lënë komunitetin dhe detyrën përpara sesa në fakt të vijë ai që është momenti zyrtar i pushimit që edhe aty ha diskutim kjo punë dhe vijnë në Tiranë. Kjo nuk është e jusitifikueshme dhe nuk është e pranueshme. Besoj që kam të gjithë mirëkuptimin tuaj për ta adresuar një orë e më parë këtë shqetësim, i cili është një shqetësim që më ka ardhur në mënyrë të përsëritur nga disa prej komuniteteve tuaja, kryesisht në juglindje të vendit, në aksin Tiranë-Korçë. Nuk flas për ata të ish PD se ata mund të rrinë në shtëpi gjithë kohës se si janë si nuk janë, prapë ata janë. Por flas për të zgjedhurit e PS në aksin Tiranë-Korcë. Nuk e kam për Sotiraqin dhe as për ministrin. Për ta mbyllur me një buzëqeshje të ëmbël dhe mos kthehet në një buzëqeshje të hidhur për asnjërin”, tha ai.
