Shitja e tokës bujqësore të huajve si në Evropë?
Seriozisht e ke?
Dëgjova një kuvendar që tha sot në Kuvend me retorikë patetike se ndryshimi i ligjit që lejon shitjen e tokës së huajve bëhet për të afruar dhe njehsuar legjislacionin e Shqipërisë me atë evropian në kuadrin e integrimeve evropiane.
Qenka një sukses pra! Kështu i mbyllkan kapituj këta? Qenka me mbyll vërtet kapitullin e marrëdhënies së shqiptarit me tokën!
Hap kapitull, mbyll kapitull!
Tani kuptova shumë!
E ke gabim shok, zotëri, çfardo qofsh komunist, ballist, zogist, agrarist, ambjentalist, a çfardo!
E para, nëse duhet ndryshuar ligji, duhet negociuar që ky modifikim që lejon shitjen e tokës së huajve mund të bëhet dhe të hyjë në fuqi vetëm pasi Shqipëria të hyjë në BE, sepse poqese ndodh përpara ka efekte të tjera.
E dyta, patjetër integrim evropian, ligji mund të lejojë shitjen të huajve të tokës, por më përpara barazoni ligjin e tokës dhe të pronës në Shqipëri me ligjet evropiane. Pra, kthejani tokën pronarëve të saj, atyre që e kanë pasur dhe pastaj ata po të duan ta shesin. Jo pasi keni bërë një ligj superkomunist mbi tokën, ndarë në ngastra, tani mbi atë vendosni një ligj gjoja evropiane. Mashtrim i madh historik me pasoja të rënda!
E treta, doni ta bëni ligjin si në Evropë, pra toka t’u shitet edhe të huajve, patjetër, tregu i tokës si çdo treg, por më parë siguroni si në Evropë mbështetjen për bujkun, agrikultorin, bëjeni bujkun shqiptar fermer si në Evropë dhe aplikoni ndihma si në Evropë për fshatarin bujqësor shqiptar. Pastaj shihni si e shet tokën ai!
E katërta, patjetër ligjet si në Evropë, por ju po negocioni që edhe të drejtën e vetos ta merrni me një vonesë, pas një faze përgatitore, përse nuk thoni një fjalë që tregu i tokës i hapur ndaj të huajve, edhe ai të marrë veprim pas disa dekadash, kur edhe bujqësia të mund t’i shpëtojë rrënimit ku e keni futur në këto dekada?
Read more:Dyshimet për tjetërsim pronash, arrestohet zv.drejtori i Kadastrës në Dibër, Daniel Gjura
E pesta, pse njësoj e shet tokën sa një parcelë një bujk i varfër shqiptar që s’ka as mekanikë, as financa, as fuqi punuese se çunat dhe gocat i kanë ikur në emigrim, dhe një fermer gjerman ta zemë që i ka të gjitha këto, apo polak, hungarez, etj. që ta shtyp kokën me autokombajna ultramoderne? Dini të krahasoni apo jo?
E gjashta, po si në BE, qeveria iu ka dhënë model zhvillimi bujqëve dhe blegtorëve, u ka hapur tregje, apo e përmbyt tregun shqiptar me zarzavate me pesticide të ardhura nga dreqi. Apo ka kontrolle si në Evropë për produktet e huaja? Se kështu fshatari i varfër shqiptar do ta shesë tokën për pesë kacidhe para një të huaji afendiko, sepse nuk ka se çfarë e bën atë. Tregu i përmbytur nga produkte të huaja. Do ta shesi tokën sikurse sheh votën!
E shtata, a është argument se meqë Agron Shehaj paska blerë vilë dhe truall përreth saj në Itali, atëhere edhe bujqit shqiptarë duhet të kenë tani një ligj që u lejon shitjen e tokës bujqësore të huajve… Cfarë logjike!
Read more:Blushi në PE: Fondet IPARD janë keqpërdorur, kërkohet hetim për abuzimet dhe transparencë nga BE
E dini more se sa përqind e tokës bujqësore në Itali mund të ketë pronar të huaj? Kodrat, fushat e Toskanës, Siçilisë, Lombardisë, etj., lulëzojnë nga fakti se bujqësia atje është e zhvilluar, jo e lënë në mëshirë të fatit nga politika si këtu dhe italiani të jep zemrën, por jo tokën.
Kështu duan ta diskreditojnë idenë e integrimit evropian? Se nuk kam shpjegim tjetër!
Kur dëgjova atë arsyetim bosh, thjesht gjoja juridik, thjesht pa asnjë logjikë krahasuese, pa i hyrë në thelb problemit, krejt manipulues, më erdhën lotë zëmërimi në sy!
