Kursim apo më shumë kredi? Shqiptarët po u drejtohen gjithnjë e më shpesh bankave, jo vetëm për të depozituar kursimet, por edhe për të financuar nevojat e tyre.
Të dhënat më të fundit të Bankës së Shqipërisë për muajin qershor tregojnë se kërkesa për kredi vijon të rritet, ndërsa kursimet mbeten në nivele rekord, mbi 1.5 trilionë lekë.
Vetëm gjatë muajit qershor, kredia e re për ekonominë arriti në 45.3 miliardë lekë, niveli më i lartë i regjistruar gjatë këtij viti. Që nga janari, kur bankat disbursuan rreth 28.2 miliardë lekë kredi të reja, huadhënia ka ardhur në rritje të vazhdueshme, duke reflektuar kërkesë më të lartë për financim nga bizneset dhe individët.
Motori kryesor i kësaj rritjeje mbeten bizneset. Në qershor, kompanitë përfituan mbi 30.4 miliardë lekë kredi të reja, duke sinjalizuar investime, zgjerim aktiviteti dhe nevoja për kapital qarkullues. Një tjetër prirje e evidentuar është orientimi gjithnjë e më i madh i bizneseve drejt kredive në lekë, ndërsa financimi në euro po përdoret më pak.
Edhe individët kanë shtuar huamarrjen. Kredia e re e disbursuar për qytetarët gjatë qershorit arriti në rreth 14.9 miliardë lekë, në rritje krahasuar me muajin maj.
Tirana kryeson huamarrjen
Tirana vijon të dominojë hartën e huamarrjes në vend, me mbi 22.4 miliardë lekë kredi të reja vetëm gjatë muajit qershor. Pas kryeqytetit renditet Durrësi me rreth 1 miliard lekë, ndërsa nivele më të ulëta regjistrohen në qarqet Elbasan, Shkodër, Korçë, Vlorë, Fier dhe Lezhë.
Nga ana tjetër, shqiptarët vijojnë të mbajnë kursime të konsiderueshme në sistemin bankar. Totali i depozitave në fund të qershorit arriti në rreth 1.54 trilionë lekë.
Depozitat në lekë u rritën me 1.88%, duke arritur në rreth 766 miliardë lekë. Ndërkohë, depozitat në valutë ranë me 0.68%, nga 782.7 miliardë lekë në maj në 777.4 miliardë lekë në qershor, ose rreth 5.3 miliardë lekë më pak.
Ndërsa kërkesa për kredi vijon të rritet dhe depozitat luhaten, zgjedhja mes kursimit dhe huamarrjes po ndikohet gjithnjë e më shumë nga nevojat për financim dhe zhvillimet në tregun valutor.
