Kufizimet për mishin e shpendëve dhe gjedhit nga Brazili, AKU: Ngarkesat për të cilat certifikata është lëshuar para 3 shtatorit, do të vijojnë të pranohen edhe pas kësaj date!

Autoriteti Kombëtar i Ushqimit ka njoftuar se ngarkesat e mishit të shpendëve dhe të gjedhit me origjinë nga Brazili, për të cilat certifikata shëndetësore veterinare zyrtare është nënshkruar ose lëshuar përpara datës 3 shtator 2026, do të vijojnë të pranohen në Pikat e Kontrollit Kufitar, edhe në rast se këto ngarkesa mbërrijnë në territorin e Republikës së Shqipërisë pas datës 3 shtator 2026.

Ky njoftim vjen pas kufizimeve që do të vendosë Shqipëria nga 3 shtatori, për importin e mishit nga Brazili, pas ndryshimit të rregullave nga Bashkimi Europian, ku Brazili u hoq nga lista e vendeve të autorizuara për eksportin e disa produkteve me origjinë shtazore.

Zbatimi i rregullave të reja në Shqipëri nis më 3 shtator 2026 dhe AKU ka njoftuar operatorët e biznesit për ndryshimin. Por ky ndalim pritet të krijojë një boshllëk të konsiderueshëm në tregun shqiptar, pasi Brazili është furnizuesi kryesor, me mbi 30 % të totalit të importit.

Read more:Gjykata Supreme e Brazilit lë në burg Ervin Matën, i rrëzon rekursin për masën: S’ka rrethana që e justifikojnë lirimin, rrezik arratisjeje! Vijojnë procedurat për ekstradimin në Shqipëri

Njoftimi i AKU:

Autoriteti Kombëtar i Ushqimit në vijim të ndryshimeve në Rregulloren Zbatuese të Komisionit (BE) 2026/1189, me të cilën është ndryshuar Rregullorja Zbatuese e Komisionit (BE) 2021/405, bën me dije se Brazili është hequr nga lista e vendeve të treta ose rajoneve të tyre të autorizuara për hyrjen në Bashkimin Evropian të dërgesave të kategorive të caktuara të kafshëve dhe produkteve me origjinë shtazore të destinuara për konsum njerëzor.

Gjithashtu, referuar edhe Urdhrit të Ministrit nr. 294, datë 13.06.2006, “Për importin e mishit nga Republika Federative e Brazilit”, importimi i këtyre produkteve kushtëzohet nga miratimi prej Bashkimit Evropian i zonave dhe stabilimenteve të prodhimit.

Read more:“Sistemi i Ramës, si i Putinit” – Lubonja për median e njohur franceze: Kryeministri ka lejuar integrimin e krimit në qeveri dhe pastrimin e parave!

Në kuadër të zbatimit të ndryshimeve, bëjmë me dije se më 28 maj 2026, në Bruksel, është zhvilluar një takim ndërmjet përfaqësuesve të UECBV (Bashkimi Evropian i Tregtisë së Blegtorisë dhe Mishit) dhe DG SANTE, gjatë të cilit përfaqësuesit e Komisionit Evropian kanë sqaruar se ngarkesat për të cilat certifikata përkatëse është lëshuar përpara datës 3 shtator 2026 do të vijojnë të pranohen në Pikat e Kontrollit Kufitar (BCP) të Bashkimit Evropian, pasi kërkesat e reja nuk zbatohen për eksportet nga vendet e treta të kryera përpara kësaj date.

Autoriteti Kombëtar i Ushqimit sqaron se ngarkesat e mishit të shpendëve dhe të gjedhit me origjinë nga Brazili, për të cilat certifikata shëndetësore veterinare zyrtare është nënshkruar dhe/ose lëshuar përpara datës 3 shtator 2026, do të vijojnë të pranohen në Pikat e Kontrollit Kufitar, edhe në rast se këto ngarkesa mbërrijnë në territorin e Republikës së Shqipërisë pas datës 3 shtator 2026.

Read more:‘Kush ndot lumin Osum do të ndëshkohet’, Dashnor Sula mbledh inspektoriatet në Berat: Tolerancë zero ndaj dëmtimit të mjedisit

Autoriteti Kombëtar i Ushqimit do të vijojë monitorimin dhe zbatimin e kërkesave të legjislacionit në fuqi, me qëllim garantimin e sigurisë ushqimore dhe mbrojtjen e shëndetit publik.